महेश सिंह लहान–जनता समाजवादी पार्टी (जसपा), नेपालले सहिदहरूको योगदानको सम्मानस्वरूप माघ ५ गते बलिदानी दिवस भव्य रूपमा मनाउने तयारी गरेको छ। सिरहाको लहानस्थित सहिद पार्कमा बिहान ८ बजे माल्यार्पण कार्यक्रम आयोजना हुनेछ। कार्यक्रममा जसपा नेपालका राष्ट्रिय अध्यक्ष माननीय उपेन्द्र यादव प्रमुख अतिथिका रूपमा सहभागी हुनेछन्।
सहिद दिवसको अवसरमा सिरहा जिल्लास्तरीय आमसभा समेत आयोजना गरिनेछ। सिरहा क्याम्पसको प्राङ्गणमा दिउँसो १ बजे हुने आमसभामा सहिदहरूका योगदानको स्मरण गर्दै लोकतान्त्रिक समाजवादका आदर्शबारे चर्चा गरिनेछ। जसपा नेपालका केन्द्रीय तथा स्थानीय नेताहरूले सम्बोधन गर्ने कार्यक्रम रहेको छ।
कार्यक्रमलाई व्यवस्थित बनाउन लहान नगरपालिका क्षेत्र नम्बर १ का नेता तथा कार्यकर्ताहरूको बैठक सम्पन्न भएको छ। बैठकमा बलिदानी दिवसलाई भव्य र मर्यादित बनाउन आवश्यक तयारीबारे छलफल गरिएको छ।
जसपा नेपाल, सिरहा जिल्ला कार्यसमितिले बलिदानी दिवसमा सबैको सहभागिताका लागि आग्रह गरेको छ। “सहिदहरूले देखाएको बाटो हाम्रो प्रेरणा हो। यो दिवसले सहिदहरूप्रति हाम्रो कृतज्ञता व्यक्त गर्न र लोकतान्त्रिक समाजवादलाई सुदृढ बनाउन मद्दत पुर्याउनेछ,” जसपा नेपालका सिरहा जिल्ला अध्यक्षले भने।
कार्यक्रम आयोजक सिरहा जिल्ला कार्यसमितिले आमसभा भव्य बनाउन नेता, कार्यकर्ता, शुभेच्छुक र सर्वसाधारणलाई कार्यक्रममा उपस्थित भई सहिदहरूको योगदानलाई सम्मान गर्न आग्रह गरेको छ।
