लहान ।सिरहाको लहानमा आइतवार भएको सडक दुर्घटनामा परि घाइते भएका उदयपुर त्रियुगा नगरपालिका-६ का ४० वर्षीय किरण थापाको उपचारका क्रममा निधन भएको छ। दुर्घटनामा घाइते थापाकी श्रीमती सुधा घिमिरे थापा र ११ वर्षीया छोरीको काठमाडौंमा उपचार भइरहेको छ।
पूर्वपश्चिम राजमार्गअन्तर्गत लहान नगरपालिका-१३ मा मोटरसाइकल र स्कुल बस ठोक्किँदा यो घटना भएको हो। बा १८ प ८३२५ नम्बरको मोटरसाइकलमा पश्चिमबाट पूर्वतर्फ जाँदै गरेका थापा र उनका परिवारलाई विपरीत दिशाबाट आएको प्र२-०१-००१प ७९ नम्बरको संकल्प विद्या आश्रमको स्कुल बसले ठक्कर दिएको थियो।
घटनापछि तीनैजना घाइतेको लहानमा तत्काल उपचार गराइए पनि गम्भीर अवस्थाका कारण हेलिकोप्टरमार्फत थप उपचारका लागि काठमाडौं लगिएको थियो। काठमाडौंमा उपचारकै क्रममा किरण थापाको मृत्यु भएको हो।
प्रहरीले बसका चालक दिपेश कुमार चौधरीलाई नियन्त्रणमा लिएको छ। मृतक थापा सिरहाको मिर्चैया नगरपालिकास्थित स्वस्तिक पाठशाला स्कुलमा लेखापालको रूपमा कार्यरत थिए। घटना घर फर्किने क्रममा भएको जनाइएको छ।
घटनाले स्थानीय क्षेत्रमा शोकको वातावरण छाएको छ भने परिवारजनको अवस्था अत्यन्तै कठिन बनेको छ।
