काठमाडौं ।सरकारलाई अस्थिर बनाउन माओवादी केन्द्रका अध्यक्ष पुष्पकमल दाहाल ‘प्रचण्ड’ सक्रिय देखिएका छन्। बालुवाटारबाट हटेपछि लगातार वर्तमान सरकार ढल्ने दाबी गर्दै आएका उनले प्रतिपक्षी ७८ सांसदलाई साथमा ल्याएर नयाँ समीकरण बनाउन खोजिरहेका छन्।
प्रचण्डले सरकारलाई असंवैधानिक, अपारदर्शी, र बिचौलियाको प्रभावमा आधारित भएको बताउँदै सत्ता परिवर्तनको सम्भावना देखाएका छन्। माघ ४ गते प्रतिपक्षी सात दललाई एकताबद्ध गर्दै पाँच बुँदे साझा धारणा सार्वजनिक गरेका उनले कांग्रेसलाई सत्ताको निम्तो दिने प्रयास गरिरहेका छन्।
हाल प्रतिपक्षीका ७८ सांसद मात्र सरकार बनाउन पर्याप्त नहुँदा कांग्रेस वा एमालेको सहयोग अनिवार्य छ। एमाले-कांग्रेसबीचको खटपटले प्रचण्डलाई मौका मिल्ने आशामा उनले दिनगन्ती गरिरहेका छन्। सत्ता फेरबदलका लागि उनको रणनीति अझै स्पष्ट आधारमा उभिन सकेको छैन।
