काठमाडौं – स्वतन्त्रता, प्रजातन्त्र स्थापना र पुनःस्थापनाका लागि जीवन आहुति दिने शहीदहरूको सम्झनामा आज देशभर शहीद दिवस मनाइँदैछ। विक्रम संवत २००७ देखि प्रत्येक वर्ष माघ १६ गते शहीद दिवस मनाउने परम्परा कायम छ।
यस अवसरमा काठमाडौंको शान्तिवाटिकाबाट लैनचौरस्थित शहीद स्मारकसम्म प्रभातफेरि आयोजना गरिएको छ, जसमा प्रधानमन्त्री, मन्त्रीहरू, उच्च अधिकारीहरू तथा सुरक्षा निकायका टोलीहरू सहभागी हुनेछन्।
यसैगरी, गोकर्णेश्वरमा निर्माण भइरहेको राष्ट्रिय शहीद स्मारकमा विशेष कार्यक्रमको तयारी गरिएको छ। शहीद गेट, लैनचौर, र गणतन्त्र स्मारकमा पनि श्रद्धाञ्जली कार्यक्रम हुनेछन्।
स्वतन्त्रताको माग गर्दा विसं १९९७ मा शुक्रराज शास्त्री, धर्मभक्त माथेमा, गंगालाल श्रेष्ठ, र दशरथ चन्दलाई मृत्युदण्ड दिइएको थियो। लखन थापादेखि हालसम्मका शहीदहरूको बलिदानलाई स्मरण गर्दै कार्यक्रम आयोजना गरिएको हो।
