दाङ – प्रधानमन्त्री केपी शर्मा ओलीले संघीयताले विकासको ढोका खोलेको बताउँदै तीनै तहका सरकारबीच सहकार्य आवश्यक रहेकोमा जोड दिए।
लुम्बिनी प्रदेशसभालाई सम्बोधन गर्दै उनले हालै सम्पन्न अन्तर्राष्ट्रिय विमानस्थल, फराकिलो सडक, सिद्धबाबा सुरुङ मार्ग, र अन्य पूर्वाधारहरूलाई प्रदेशको प्रगतिका सूचकका रूपमा उल्लेख गरे। लुम्बिनीलाई कृषि, पर्यटन, र औद्योगिक केन्द्रका रूपमा अघि बढाउने प्रतिबद्धता पनि व्यक्त गरे।
प्रधानमन्त्रीले ६ अर्ब १८ करोड रुपैयाँ लागतमा निर्माण सुरु भएको १,२०० शय्याको लुम्बिनी प्रादेशिक अस्पतालको प्रशंसा गर्दै स्वास्थ्य सेवामा सहकार्य आवश्यक रहेको बताए।
प्रविधिको सही उपयोगमा ध्यान दिनुपर्ने भन्दै उनले प्रदेशहरूलाई कानुनी संरचना निर्माण गर्दा संघीय कानुनलाई आधार मान्न आग्रह गरे। संघीयता कार्यान्वयनका चुनौती समाधान गर्न सहकार्य अपरिहार्य रहेको उनले बताए।
