लहान – फाल्गुन १०:सिरहा जिल्लाको नवराजपुर गाउँपालिका–१ भगवतिपुरमा १७ वर्षीया किशोरी रिंकु सदायमाथि सामूहिक बलात्कारपछि नृशंस हत्या गरिएको घटना सार्वजनिक भएको छ। गाउँकै तीन युवकले गरेको यो जघन्य अपराधलाई दबाउन स्थानीय पंचहरूले प्रयास गरे पनि अन्ततः पीडितको हत्या भएपछि घटना बाहिरिएको हो।
जनता समाजवादी पार्टी, नेपाल (जसपा) मधेश प्रदेश समितिले घटनाको कडा शब्दमा निन्दा गर्दै अपराधीहरूलाई कानुनी कठघरामा उभ्याउन माग गरेको छ। पार्टीका अध्यक्ष बालकिशोर प्रसाद यादवले विज्ञप्ति जारी गर्दै भने, “बलात्कारीलाई जोगाउने जो-कोहीलाई पनि कानुनी कारबाहीको दायरामा ल्याउनुपर्छ। प्रहरी प्रशासनको मौनता अपराधीलाई संरक्षण गर्ने नियतझैं देखिन्छ।”
जसपाले दोषीहरूलाई तत्काल कडा कारबाही गर्नुपर्ने माग राख्दै सम्बन्धित निकायलाई दबाब दिएको छ। यस घटनाले कानुनी शासनमाथि गम्भीर प्रश्न उठाएको छ भने, समाजमा व्याप्त जातीय र लैंगिक विभेदको तीतो यथार्थ पुनः सतहमा ल्याएको छ।
अब प्रश्न यो छ— अपराधी सजाय भोग्छन् कि शक्तिशाली संरक्षणमा उम्किन्छन्? पीडित परिवारलाई न्याय मिल्छ कि फेरि पनि अन्यायको शिकार बन्नेछ?
