नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनताको समस्या बुझ्न तराई-मधेस केन्द्रित जागरण अभियान सञ्चालन गरिएको बताएका छन्।
बुधबार विराटनगरमा प्रेस सेन्टर मोरङले आयोजना गरेको पत्रकार सम्मेलनमा प्रचण्डले यो अभियान भाषणका लागि नभई किसान, स्थानीय बासिन्दा, पत्रकार र विभिन्न क्षेत्रका व्यक्तिहरूसँग सम्बन्ध सुदृढ गर्न सञ्चालन गरिएको स्पष्ट पारे। यसक्रममा उनले २०६४ सालको झल्को आएको अनुभव सुनाए।
उनले वर्तमान सरकार माओवादीले सुरु गरेको सुशासनको आधारमा बनेको बताउँदै, जनतामा परिस्थितिको जानकारी दिन अभियान थालिएको उल्लेख गरे। उपराष्ट्रपतिलाई माओवादी पार्टीमा ल्याउने विषयमा हतार नगरिने र कुन तहमा समायोजन गर्नेबारे छलफल हुने बताए।
कांग्रेस र एमालेलाई ठूलो पार्टी बनाउन माओवादीले सहयोग गरेको दाबी गर्दै उनले कोसी उपचुनावमा माओवादी ठूलो पार्टी बनेको उल्लेख गरे। माओवादी सरकार भ्रष्टाचारीले ढालेको आरोप लगाउँदै, स्थिरताको लागि माओवादीलाई जित्न आवश्यक रहेको र आफूहरू एक नम्बर पार्टी बनाउने लक्ष्यमा रहेको सुनाए।
संघीय लोकतान्त्रिक गणतन्त्रपछि प्रत्यक्ष निर्वाचित कार्यकारीप्रति माओवादीको रिजर्भेसन रहेको भन्दै उनले स्थानीय तहमा स्वतन्त्र उम्मेदवारको उपस्थितिबाट फरक नपर्ने बताए।
प्रचण्डले अब निर्वाचनमा कांग्रेस वा एमालेसँग गठबन्धन नगर्ने स्पष्ट पारे। जनताको चेतना इतिहासबाट धेरै अघि बढिसकेको उल्लेख गर्दै, राजतन्त्र फर्किन नसक्ने दाबी गरे।
उनले माओवादी बलियो बन्दै गएको नोकरशाहीलाई मन नपरेको भन्दै पार्टीभित्र कुनै विवाद नरहेको स्पष्ट गरे। सरकार २०८४ सालसम्म टिके पनि माओवादीलाई फरक नपर्ने उल्लेख गर्दै, सरकार बनाउने र ढाल्ने खेलमा आफूहरू नलाग्ने बताए।
प्रचण्डका अनुसार, संविधान निर्माणका क्रममा माओवादीका धेरै इन्डिकेसनहरू रहेको र सबै परिवर्तन माओवादी आन्दोलनको जगमा बनेको हो।
