सप्तरी १६ फागुन – नेपाल कम्युनिष्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले माओवादी जनयुद्धकै पृष्ठभूमिमा मधेश आन्दोलन सम्भव भएको दाबी गर्नुभएको छ।
राजविराजमा आयोजित माओवादीको हुलाकी राजमार्ग केन्द्रीत अभियानका क्रममा बोल्दै उहाँले मधेश आन्दोलनबाट जन्मिएका दलहरू अहिले विस्तारै विघटनउन्मुख भएकामा दुःख व्यक्त गर्नुभयो। साथै, उहाँले सक्कली मधेशवादी शक्ति माओवादी नै रहेको तर्क गर्नुभयो।
अध्यक्ष दाहालले गणतन्त्रवादी नेता रामराजाप्रसाद सिंहलाई गणतन्त्रको पहिलो राष्ट्रपति बनाउन माओवादीले पहल गरे पनि मधेशवादी दलहरूले नै उहाँलाई असफल बनाएको आरोप लगाउनुभयो। “हाम्रो पार्टीले सिंहलाई गणतन्त्रको पहिलो राष्ट्रपतिका रूपमा अघि बढायौँ, तर मधेशवादी भनिएका दलहरूले नै उहाँलाई हराए,” उहाँले भन्नुभयो।
मधेशको मुद्दा उठानका लागि पार्टीले नयाँ अभियान सुरु गरेको उल्लेख गर्दै अध्यक्ष प्रचण्डले माओवादी र मधेशका शक्तिहरू मिलेर आन्दोलनका उपलब्धिहरू जोगाउनु आवश्यक रहेको बताउनुभयो।
