महेश सिंह लहान – लहान एभरेस्ट कलेज/माध्यमिक विद्यालयले आफ्नो २५औँ वार्षिकोत्सव (रजत जयन्ती) तथा अभिभावक दिवस विशेष समारोहका साथ फागुन ७ गते, बुधवार भव्य रूपमा सम्पन्न गरेको छ। कलेज प्राङ्गणमा आयोजित उक्त कार्यक्रममा शिक्षा, समाजसेवा, पत्रकारिता, उद्यमशीलता तथा विभिन्न क्षेत्रमा योगदान पुर्याउने व्यक्तित्वहरूलाई विशेष सम्मान प्रदान गरियो।
कार्यक्रमका प्रमुख अतिथि पूर्वमन्त्री पदम नारायण चौधरीले हालको शिक्षामा सुधार आवश्यक रहेकोमा जोड दिँदै भने, “हाम्रो पालामा चिट चोर्ने शिक्षा नीति थिएन। अहिलेको शिक्षालाई सुधार गर्दै व्यावहारिक सीप विकासतर्फ उन्मुख गरिनु जरुरी छ।” उनले लहान एभरेस्ट कलेजले शिक्षा क्षेत्रमा अलग्गै पहिचान बनाउन सफल रहेको उल्लेख गर्दै कलेज परिवारलाई बधाई तथा शुभकामना दिए।
कलेजका प्रिन्सिपल धरनीधर अधिकारीका अनुसार समाजसेवा, शिक्षा तथा उद्यमशीलतामा योगदान दिने विशिष्ट व्यक्तित्व, पूर्वविद्यार्थी, पत्रकार, समाजसेवी र स्थानीय अगुवाहरूलाई सम्मान गरिएको छ। कलेज व्यवस्थापनले भविष्यमा पनि समाजसेवामा योगदान पुर्याउने व्यक्तित्वहरूलाई विशेष सम्मान दिने नीति अवलम्बन गर्ने जनाएको छ।
कलेजले शिक्षालाई रोजगारसँग जोड्दै, सीपमूलक शिक्षा तथा आत्मनिर्भरतालाई प्रवर्द्धन गर्ने उद्देश्यले विशेष कार्यक्रमहरू सञ्चालन गरेको छ। विद्यार्थीहरूलाई व्यवसायिक सीप तथा उद्यमशीलता सम्बन्धी जानकारी गराइने कार्यक्रमहरू प्रस्तुत गरिएको थियो।
कार्यक्रममा विद्यार्थीहरूले झाँकी, कला प्रदर्शनी, नृत्य तथा नाटक प्रस्तुत गरेका थिए। विशेषगरी स्थानीय संस्कृति र आधुनिक शिक्षाबीचको सम्बन्ध दर्शाउने प्रस्तुतीहरू कार्यक्रममा समावेश गरिएका थिए।
विद्यालय व्यवस्थापनका अनुसार कार्यक्रममा विद्यार्थी, अभिभावक, शिक्षक, समाजसेवी तथा स्थानीय नागरिकहरूको उत्साहजनक सहभागिता रहेको थियो। विद्यालयले आगामी दिनमा विद्यार्थीहरूलाई विभिन्न सीप, व्यवसाय तथा उद्यमशीलतासँग जोड्न थप नविनतम् कार्यक्रमहरू सञ्चालन गर्ने योजना रहेको जनाएको छ।
कलेजबाट अध्ययन पूरा गरी विभिन्न क्षेत्रमा सफलता हासिल गरेका पूर्वविद्यार्थीहरूलाई पनि विशेष सम्मान प्रदान गरिएको थियो। उनीहरूको अनुभव र सफलताको कथा विद्यार्थीहरूमाझ प्रस्तुत गर्दै उनीहरूलाई प्रेरित गरियो।
विद्यालय व्यवस्थापनले अभिभावक, शिक्षक, विद्यार्थी, समाजसेवी तथा सम्पूर्ण सरोकारवालासँगको सहकार्यद्वारा शिक्षाको गुणस्तर वृद्धि गर्दै समाजको समृद्धिमा योगदान पुर्याउने लक्ष्य लिएको छ।
रजत जयन्ती समारोह भव्य रूपमा सम्पन्न गर्दै लहान एभरेस्ट कलेजले शिक्षाको प्रवर्द्धनमा नयाँ उचाइ तय गर्ने प्रतिबद्धता व्यक्त गरेको छ।
