प्रदिप सिंह
लहान : मिडिया काउन्सिल, मधेस प्रदेश जनकपुरधामको आयोजनामा पत्रकार आचार संहिता पालना सम्बन्धी गोष्ठी लहानमा आयोजित भएको छ। नेपाल पत्रकार महासंघ, सिराहा शाखाको समन्वयमा आयोजित कार्यक्रममा मधेस प्रदेशका गृह तथा सञ्चारमन्त्री राजकुमार लेखी प्रमुख अतिथिका रूपमा उपस्थित थिए।
गोष्ठीमा नेपाल पत्रकार महासंघका केन्द्रीय सदस्य राजेश कारण, मिडिया काउन्सिल, मधेस प्रदेशका कैलाश दास, र नेपाल पत्रकार महासंघ, सिराहा शाखाका सभापति मनोज बनैता उपस्थित थिए।
मन्त्री लेखीले भने, “राजतन्त्र फर्काउने कुनै सम्भावना छैन। केही स्थानमा प्रतिगमनको कुरा उठाइए पनि जनताको समर्थन पाएको देखिँदैन।” उनले राष्ट्रिय प्रजातन्त्र पार्टी (राप्रपा) जस्ता दलहरूले राजतन्त्रको एजेन्डा बोके तापनि, नेपाली जनताले त्यसलाई अस्वीकार गरिसकेको बताए। “राजतन्त्र भनेको शोषणको प्रतीक हो। संघीयता, समावेशिता र समानुपातिक प्रणालीविरुद्ध बोल्नेहरूलाई जनताले समर्थन गर्दैनन्,” उनले थपे।
मन्त्री लेखीले पत्रकारिता क्षेत्रका विभिन्न समस्याहरूको समाधानका लागि सरकारको प्रतिबद्धता जनाए। उनले सामाजिक सञ्जाल, विज्ञापन, र पत्रकारहरूको जीवन बीमा जस्ता विषयमा गम्भीर ध्यानाकर्षण भएको बताए। “प्रदेश र संघ सरकारका सञ्चार मन्त्री तथा प्रवक्ताहरूको महत्त्वपूर्ण बैठक १७ गते काठमाडौंमा हुँदैछ। म त्यहाँ पत्रकारिता क्षेत्रका चुनौतीहरूबारे आवाज उठाउनेछु,” उनले भने।
गोष्ठीले पत्रकार आचारसंहिताको पालनाबारे जागरुकता ल्याउनुका साथै पत्रकारिताका विविध पक्षबारे बहस चलाएको थियो। सहभागी पत्रकार र वक्ताहरूले निष्पक्ष पत्रकारिता, विज्ञापन नीति, र पत्रकार कल्याणका विषयमा राज्यको गम्भीर ध्यानाकर्षण गराउनुपर्ने माग गरे।
