महेश सिंह लहान – मोरङको दागरबैरीया स्थित किसान निमावि विद्यालयका सेवा निवृत्त शिक्षक काशीलाल चौधरीले समाजसेवाको उत्कृष्ट उदाहरण प्रस्तुत गर्दै चमार (राम) समुदायको संगठन रबिदास सेवा समितिलाई चार धुर निजी जग्गा दान गरेका छन्।
सिरहा जिल्लाको धनगढीमाई नगरपालिका–२, भवानीपुर निवासी चौधरीले आफ्नो निजी जग्गा समिति अध्यक्ष जोगिन्द्र रामलाई विधिवत् रूपमा लालपुर्जासहित हस्तान्तरण गरेका हुन्। उक्त जग्गा हस्तान्तरण कार्यक्रममा स्थानीय समाजसेवी राम आशिष रायको विशेष पहल रहेको जनाइएको छ।
भवानीपुरस्थित चमार समुदायको बसोबास रहेको बस्तीमा हाल करिब ८२ घरधुरी छन्, जसमा अधिकांश परिवारसँग निजी जग्गा छैन। यस कारण उनीहरू लामो समयदेखि बल्क (सरकारी) जग्गामा आश्रित भएर जीवन यापन गर्दै आएका छन्।
समाजसेवी राय सन् १९८६ (वि.सं. २०४३) देखि सामाजिक कार्यमा सक्रिय रहँदै आएका छन्। चौधरीको यो योगदानले समुदायको सशक्तीकरण तथा समानताको पक्षमा महत्वपूर्ण सन्देश दिएको स्थानियहरूले बताएका छन्।
रबिदास सेवा समितिका अध्यक्ष जोगिन्द्र रामले जग्गा दानप्रति आभार प्रकट गर्दै उक्त सम्पत्ति सामाजिक भवन निर्माण तथा सामुदायिक प्रयोजनमा प्रयोग गरिने जानकारी दिएका छन्।
