लहान १५ असार ।सिरहा जिल्लाको लहान नगरपालिका–१० स्थित श्री जनता माध्यमिक विद्यालय, बैरिया गुदिगाउँमा शिक्षण अभ्यासमा सहभागी भएका स्नातक तह (बी.एड.) चौथो वर्षका विद्यार्थीहरूलाई बिदाइ गरिएको छ।
जेएस मुरारका बहुमुखी क्याम्पस, लहान–१०, सिरहाबाट आएका छात्र/छात्राहरूले मिति २०८२ असार ६ गतेसम्म शिक्षण अभ्यास सफलतापूर्वक सम्पन्न गरेका हुन्। मिति २०८२ जेठ १८ गतेदेखि असार ६ गतेसम्म सञ्चालन भएको अभ्यास अवधिभर उनीहरूले कक्षा सञ्चालन, पाठ योजना निर्माण, विद्यार्थीसँग अन्तरक्रिया लगायत विभिन्न शैक्षिक गतिविधिमा सक्रिय सहभागिता जनाएका थिए।
कार्यक्रमका क्रममा विद्यालयका प्रधानाध्यापक रङ्गलाल शाहले विद्यार्थीहरूको प्रयासको प्रशंसा गर्दै भविष्यमा अझ राम्रो शिक्षक बन्ने विश्वास व्यक्त गरे। विद्यालयका शिक्षक तथा शिक्षिकाहरूले विद्यार्थीहरूलाई खादा, टीका लगाई बधाई तथा शुभकामना दिंदै बिदाइ गरेका थिए।
विद्यालय र क्याम्पसबीचको सहकार्यले शिक्षण अभ्यास कार्यक्रम प्रभावकारी र सफल बनेको सहभागीहरूको प्रतिक्रिया थियो।
