सिरहा २९ असार। सिरहाको औरही गाउँपालिका–५ स्थित मलाह टोलबाट दुई क्विन्टलभन्दा बढी लागूऔषध गाँजासहित एक युवकलाई प्रहरीले नियन्त्रणमा लिएको छ। पक्राउ पर्ने युवक सोही स्थानका २३ वर्षीय राम उदगार मलाह रहेका छन्।
जिल्ला प्रहरी कार्यालय सिरहा र प्रहरी चौकी औरहीबाट खटिएको संयुक्त टोलीले गोप्य सूचनाका आधारमा शुक्रबार राति सवारीसाधनमार्फत गाँजा ओसारपसार भइरहेको भन्ने सूचना पाएपछि छापा मारेको थियो। प्रहरीले दिएको जानकारी अनुसार प्र२–०१–००३प २१५४ नम्बरको मोटरसाइकलमा गाँजा बोकिरहेका मलाहलाई नियन्त्रणमा लिइएको हो।
पक्राउका क्रममा प्रहरीले सातवटा पोका फेला पारेको थियो, जसको तौल २ क्विन्टल १२ किलो ९२५ ग्राम रहेको छ। गाँजा बरामद गरेपछि राम उदगार मलाहलाई मोटरसाइकलसहित नियन्त्रणमा लिइएको र घटनाबारे थप अनुसन्धान भइरहेको जिल्ला प्रहरी कार्यालय सिरहाका सूचना अधिकारी प्रहरी नायब उपरीक्षक (डीएसपी) वीरेन्द्रकुमार पासवानले जानकारी दिए।
घटनास्थलबाट अन्य केही व्यक्ति भने प्रहरीलाई देख्नासाथ फरार भएका थिए। उनीहरूको खोजी कार्य तीव्र पारिएको प्रहरीले जनाएको छ। पक्राउ परेका मलाहलाई ५ दिनको म्याद लिई अनुसन्धान अघि बढाइएको समेत प्रहरीले जनाएको छ।
