जनकपुरधाम २९ असार ।सामाजिक सञ्जाल TikTok को प्रत्यक्ष प्रसारण (Live) मार्फत अश्लील गालीगलौज र आपत्तिजनक शब्दावली प्रयोग गरी सामाजिक मर्यादाविरुद्ध कार्य गरेको आरोपमा धनुषाकी एक युवतीलाई प्रहरीले नियन्त्रणमा लिएको छ।
जिल्ला प्रहरी कार्यालय धनुषाबाट खटिएको टोलीले जनकपुर उप-महानगरपालिका–२४ की मोतिन शेखकी करिब २० वर्षीया छोरी रोशनी खातुनलाई नियन्त्रणमा लिएको हो। प्रहरीका अनुसार उनले TikTok Live मा निरन्तर रुपमा अश्लील भाषा प्रयोग गर्दै गालीगलौज गर्ने, अपशब्द बोल्ने र अन्य प्रयोगकर्तामाथि नकारात्मक असर पार्ने खालका अभिव्यक्ति दिने गरेकी थिइन्।
प्रहरीको प्रारम्भिक अनुसन्धानमा रोशनीले सामाजिक सञ्जालको मर्यादा तोड्दै सार्वजनिक शिष्टाचारमाथि आघात पुर्याउने शैलीमा भिडियो सामग्री सम्प्रेषण गर्दै आएकी पुष्टि भएको छ।
उनीविरुद्ध “अभद्र व्यवहार सम्बन्धी कसुर” अन्तर्गत म्याद थप गरी जिल्ला प्रहरी कार्यालय धनुषाको हिरासतमा राखिएको छ। थप अनुसन्धान जारी रहेको प्रहरीले जनाएको छ।
