महेश सिंह,सिरहा –हिन्दू महिलाहरूको महान् पर्व हरितालिका तिज देशभर उल्लासपूर्वक मनाइएको छ। सिरहाको लहान, धनगढीमाई, गोलबजारलगायतका क्षेत्रमा महिलाहरूले दर खाई आज व्रत बसेर शिव–पार्वतीको आराधनामा तल्लीन हुँदै तिज पर्व मनाएका छन्।
लहान–३ स्थित प्यारागन स्कुलमा कार्यरत महिला कर्मचारीहरूले भव्य कार्यक्रमसहित तिज मनाएका थिए। कार्यक्रममा स्कुलका संस्थापक प्रिन्सिपल उमेश चौधरीले महिला कर्मचारीलाई तीजको अग्रिम शुभकामना दिँदै सम्मानपत्र प्रदान गरेका थिए।
पर्वको अवसरमा महिलाहरू रातो पोशाक, हरियो चुरा र मेहँदीसहित परम्परागत भेषभूषामा सजिएर गीत, नृत्य र भजनमार्फत तीजको उल्लास प्रकट गरेका थिए। कतिपय स्थानमा स्थानीय समाजसेवी संस्थाले सामूहिक दर कार्यक्रम आयोजना गरेका थिए भने मन्दिर क्षेत्रमा सुरक्षा निकायले विशेष सुरक्षा व्यवस्था मिलाएको थियो।
शिवमन्दिरमा बिहानैदेखि महिलाहरू लामबद्ध भई पूजा–अर्चना गरेका थिए। परम्पराअनुसार महिलाले तीजलाई दाम्पत्य सुख, पति दीर्घायु र परिवारको समृद्धिको कामनासहित मनाउने प्रचलन रहेको छ।
