काठमाडौं।नवनियुक्त शिक्षा, विज्ञान तथा प्रविधिमन्त्री महावीर पुनले पदभार सम्हाल्नेबित्तिकै अनौठो शैलीमा काम सुरु गर्नुभएको छ। उहाँले विज्ञान, प्रविधि, आर्टिफिसियल इन्टेलिजेन्सलगायत क्षेत्रमा सुझाव दिन चार सल्लाहकार समिति गठन गर्ने पहिलो निर्णय गर्नुभएको हो।
विज्ञान सचिव विश्वबाबु पुडासैनीले तयार पारेको टिप्पणीमा हस्ताक्षर गर्दै गरिएको सो निर्णयका आधारमा समितिको प्रतिवेदनअनुसार कार्ययोजना तयार गरी कार्यान्वयन हुने मन्त्रालयले जनाएको छ।
शपथपछि पत्रकारसँग कुरा गर्दै मन्त्री पुनले आफू “अपर्झट मन्त्री” भएको उल्लेख गर्दै सेवा–सुविधाभन्दा काममा जोड दिने बताउनुभयो। उहाँले हाँस्य शैलीमा भन्नुभयो–
“म मन्त्रालयमै ओच्छ्यान लगाएर सुत्छु, यहीँ बस्छु, यहीँ पकाएर खान्छु, काम गर्न आएको हुँ।”
शिक्षा क्षेत्रमा तत्काल सुधारका ठूला घोषणा गर्नुभन्दा अध्ययनपछि मात्र बोल्ने बताउँदै उहाँले विज्ञान मन्त्री हुने अपेक्षा भए पनि शिक्षा टुक्र्याउन नमिल्ने भएकाले दुबै जिम्मेवारी लिएको स्पष्ट पार्नुभयो।
जेन–जी आन्दोलनका क्रममा सिंहदरबारस्थित शिक्षा मन्त्रालय क्षतिग्रस्त भएपछि उहाँको कार्यकक्ष हाल केशरमहलमा तयार गरिएको छ।
पदभार ग्रहण गर्दै सोमबार बिहान सामाजिक सञ्जालमार्फत उहाँले असामान्य घोषणा गर्नुभएको थियो–
“बधाई दिन खादा–माला लिएर नआउनुहोस्, बरु ५ महिनाभित्र गर्न सकिने ठोस काम र आइडिया भए मेरो ह्वाट्सएपमा पठाउनुहोस्। मलाई मन्त्री नभन्नुहोस्, भने कवाडी वैज्ञानिक भन्नुहोस्।”
सो घोषणाले मन्त्रालयका कर्मचारीलाई अचम्ममा पारेको छ। कसरी सम्बोधन गर्ने भन्ने दोधार उनीहरूमा देखिएको छ।
सादा जीवन र उच्च विचारका अभियन्ता पुनले विगतमा आविष्कार केन्द्रलाई आर्थिक सहयोग जुटाउन गाउँ–गाउँमा घुम्दै किताब बेचेका थिए। उहाँको पुस्तक “महावीर पुन सम्झना, सपना र अविरल यात्रा” को हालसम्म २ लाख ४० हजारभन्दा बढी प्रतिलिपि बिक्री भइसकेको छ।
अमेरिकाको नेब्रास्का विश्वविद्यालयबाट उच्च शिक्षा हासिल गरेका मन्त्री पुनले गाउँ–गाउँमा ताररहित इन्टरनेट सेवा पुर्याउनेदेखि नवप्रवर्तन प्रवर्द्धनमा योगदान दिएका छन्। सन् २००७ मा उहाँले एसियाली नोबल मानिने म्यागासेसे पुरस्कार प्राप्त गर्नुभएको थियो।
