महेश सिंह लहान सिरहा-लायन्स क्लब अफ लहान फुलबारीका द्वितीय उपाध्यक्ष तथा लहानका प्रख्यात सुनचाँदी व्यवसायी मनिष सारडाकी आमा पुष्पा देवी सारडाको शनिबार बिहान निधन भएको छ। पारिवारिक स्रोतका अनुसार धार्मिक र संस्कारयुक्त जीवन बिताएकी ७० वर्ष हाराहारीकी पुष्पा देवीको निधनले परिवारसहित सम्पूर्ण समाजसेवी समुदायलाई स्तब्ध पारेको हो।
लायन्स क्लब अफ लहान फुलबारीले विज्ञप्ति जारी गर्दै उहाँको निधनप्रति गहिरो श्रद्धाञ्जली अर्पण गरेको छ। क्लबले शोक सन्तप्त परिवारलाई धैर्यधारण गर्ने शक्ति भगवानले प्रदान गरून् भन्ने कामना गरेको छ।
शोकाकुल छोरासमेत रहेका लायन्स क्लबका उपाध्यक्ष र सुनचाँदी व्यवसायी मनिष सारडाले आमाको निधनप्रति मर्मस्पर्शी शब्दमा प्रतिक्रिया व्यक्त गर्दै भने, “आमा नै हाम्रो परिवारको आधारस्तम्भ हुनुहुन्थ्यो, उहाँकै प्रेरणाले समाजसेवा र व्यवसायमा अघि बढ्न सकिरहेको छु। उहाँको वियोगले हामीलाई असह्य पीडा भएको छ।”
लहानका व्यापारी, समाजसेवी तथा सर्वसाधारणले सामाजिक सञ्जालमार्फत श्रद्धाञ्जली अर्पण गर्दै पुष्पा देवीलाई धार्मिक र सेवाभावी महिला भनेर स्मरण गरेका छन्। फेसबुकमा श्रद्धाञ्जली अर्पण गर्नेको ओहिरो लागिरहेको छ।
पारिवारिक परम्परा अनुसार अन्त्येष्टि गरिने जनाइएको छ। स्थानीयवासीहरूले पुष्पा देवीको निधनले लहानको सामाजिक र धार्मिक क्षेत्रमा ठूलो क्षति पुगेको टिप्पणी गरेका छन्।
