महेश सिंह लहान – सिरहाको लहान नगरपालिका–३, हस्पिटलचोक नजिकै नौ करोड रुपैयाँको लगानीमा निर्मित अत्याधुनिक ‘कार्निभल सिनेम्याक्स’ सिनेमा हल शुक्रबारदेखि सञ्चालनमा आएको छ।
स्थानीय मुरारका परिवारको लगानीमा बनेको उक्त हलको उद्घाटन सिरहाका प्रमुख जिल्ला अधिकारी सुरेन्द्र पौडेलले एक समारोहका बीच उद्घाटन गरेका हुन्।
हलका अध्यक्ष अभिनव मुरारकाका अनुसार, “कार्निभल सिनेम्याक्स पूर्वाञ्चलकै पहिलो अत्याधुनिक प्रविधियुक्त सिनेमा हल” हो। १३८ सिट क्षमताको यो हलमा एडभान्स साउन्ड सिस्टम, उच्च गुणस्तरको प्रोजेक्टर, र डिजिटल टिकेटिङ प्रणाली जस्ता आधुनिक सुविधा उपलब्ध छन्।
मुरारकाले भने, “यो केवल सिनेमा हल मात्र होइन, लहानमा मनोरञ्जन र पर्यटन प्रवद्र्धन गर्ने नयाँ गन्तव्य पनि हो। समय र दर्शकको चाहनाअनुसार प्रविधिमा लगानी गरिएको छ।”हलमा दैनिक चारवटा शो सञ्चालन हुने र टिकट दर ३०० देखि ९०० रुपैयाँसम्म निर्धारण गरिएको छ। यसमा नेपाली, हिन्दी र अन्य क्षेत्रीय भाषाका चलचित्र प्रदर्शन गरिनेछ।
उद्योग वाणिज्य सङ्घ सिरहा, लहानका अध्यक्ष विकास सारडाले भने,
“लहानमा अब ‘गतिलो सिनेमा हल छैन’ भन्ने गुनासो समाप्त भएको छ। यो लगानीले लहानको अर्थतन्त्र र पर्यटनमा सकारात्मक प्रभाव पार्नेछ।”त्यस्तै, लहान नगरपालिका–७ का वडाध्यक्ष राम औतार शर्माले भने,
“यस किसिमको लगानीले लहानलाई सांस्कृतिक तथा आर्थिक रूपमा सशक्त बनाउनेछ। भारतीय सीमा नजिक भएकाले यो हलले सीमावर्ती दर्शकलाई पनि आकर्षित गर्नेछ।”
वीरगञ्जबाहेक मधेस प्रदेशमा यस किसिमको अत्याधुनिक हल नहुँदा सिरहा, सप्तरी, उदयपुरका दर्शकहरू फिल्म हेर्न टाढासम्म जान बाध्य थिए।
अब भने लहानमै उच्चस्तरीय मनोरञ्जन सुविधा उपलब्ध भएपछि स्थानीय र सीमावर्ती भारतीय दर्शकहरूको केन्द्र बन्ने अपेक्षा गरिएको छ।
‘कार्निभल सिनेम्याक्स’को उद्घाटनसँगै सिरहाको लहान मनोरञ्जन, पर्यटन र व्यापारिक विकासको नयाँ गन्तव्यका रूपमा उभिन लागेको स्थानीय व्यवसायीहरूको भनाइ छ।
