काठमाडौं । नेकपा (एकीकृत समाजवादी) परित्याग गरी पुनः नेकपा (एमाले) फर्किएकी नेतृ रामकुमारी झाँक्रीले जनताको रक्षक शक्ति एमालेबाहेक अरू हुन नसक्ने बताएकी छन्। सोमबार राष्ट्रिय सभा गृहमा आयोजित ‘एमालेको घर फर्क’ अभियान समारोहमा सम्बोधन गर्दै झाँक्रीले आफू कुनै सर्तबिना एमालेमा फर्किएको स्पष्ट पारिन्।
उनले भनिन्, “तपाईंहरूको क्यामेरा मप्रति फर्किरहँदा मलाई थाहा छ, मलाई विगत र अहिलेको हेरेर ट्रोल गर्नुहुन्छ होला। त्यो मलाई स्वीकार्य छ। यो आजको वास्तविकता हो। हामी वास्तविकताबाट टाढा हुन सक्दैनौं।”
झाँक्रीले हालको राजनीतिक अवस्थालाई “एमाले भर्सेस जेन–जी आन्दोलनका स्टेकहोल्डर र पीडित पक्षबीचको ध्रुवीकरण” को रूपमा चित्रण गरिन्। उनले जेन–जी आन्दोलनलाई एउटा पुस्ताको आक्रोश भने पनि त्यसको आडमा तत्कालीन सरकारविरुद्ध विध्वंस मच्चाउनेहरूलाई जवाफ दिनुपर्ने बेला आएको बताइन्।
उनका अनुसार, “जेन–जीको नाममा जे भइरहेको थियो, त्यो नितान्त सरकारविरुद्धको प्रहार थियो।” उनले सिंहदरबार, सर्वोच्च अदालत र निजी घर–व्यापारिक भवनमा आगजनी गर्नेहरूले जवाफ दिनुपर्ने बताउँदै सो घटनाको स्वामित्व लिन खोज्नेहरूलाई आलोचना गरिन्।
पूर्वमन्त्रीसमेत रहेकी झाँक्रीले एमाले नै नेपालको कम्युनिस्ट आन्दोलनको मूल प्रवाह मात्र नभई लोकतान्त्रिक आन्दोलन, विकास, सुशासन र समृद्धिको आकाङ्क्षा देखाउने पार्टी भएको बताइन्। उनले अध्यक्ष केपी शर्मा ओलीलाई राष्ट्रवादी नेताको संज्ञा दिँदै “फागुन २१ गते चुनाव भएपनि एमाले नै जनताको रक्षक शक्ति हो” भन्दै जोड दिइन्।
कार्यक्रममा एमाले नेता किसान श्रेष्ठले प्राणभन्दा प्यारो पार्टी नेकपा (एमाले)” भन्दै अब पार्टीले दिने जुनसुकै जिम्मेवारी लिन तयार रहेको बताए। कार्यक्रममा एमाले फर्किएका नेताहरूले यसअघि प्रयोग गर्दै आएका ‘कलम’ चिन्ह पनि अध्यक्ष ओलीलाई प्रतीकात्मक रूपमा फिर्ता गरेका थिए।
