महेश सिंह लहान सिरहा- मधेस प्रदेशमा कान उपचारका विशेषज्ञ सेवा अभावबीच सिरहाको लहानमा निजी क्षेत्रको पहलमा अत्याधुनिक ‘सम्पूर्ण कान स्वास्थ्य केन्द्र’ सेवा विस्तारमा आएको छ। लहान–३, अस्पताल चोक नजिकै सोमबारदेखि सञ्चालनमा आएको यो केन्द्रलाई प्रदेश–स्तरमै कान उपचारका लागि नयाँ र विश्वसनीय गन्तव्यका रूपमा हेरिन थालेको छ।
उद्घाटन समारोहमा लहान नगरपालिकाका मेयर महेशप्रसाद चौधरीले लामो समयदेखि जनकपुर, विराटनगर र काठमाडौं धाउन बाध्य थिएका बिरामीका लागि यो केन्द्र ठूलो राहत सावित हुने विश्वास व्यक्त गरे। “स्वास्थ्य पूर्वाधार अभावका कारण सामान्यदेखि जटिल रोगसम्म उपचारविहीन हुने अवस्था अब बदलिन्छ,” उनले भने, “सुलभ शुल्क, विशेषज्ञको नियमित उपस्थिति र आधुनिक उपकरणको संयोजनले लहानलाई स्वास्थ्य सेवाको उदाउँदो केन्द्र बनाउनेछ।”
केन्द्रका अध्यक्ष तथा किस्ट मेडिकल कलेजका सहप्राध्यापक, ईएनटी विशेषज्ञ डा. ऋषि भट्टका अनुसार केन्द्रमार्फत ४० प्रकारका कानसम्बन्धी रोगको निदान र उपचार नियमित रूपमा उपलब्ध हुनेछ। अत्याधुनिक एन्डोस्कोपिक प्रविधिमार्फत धेरै सर्जरी चिरफारबिनै हुने भएकाले बिरामीलाई कम जोखिम र छिटो सुधारको सुविधा रहने उनको भनाइ छ।
डा. भट्टले भने, “कानको जाली टाल्ने वा फेर्नेदेखि श्रवण क्षमता घट्ने, जाम हुने, पाक्ने, रिँगटा लाग्ने जस्ता अधिकांश समस्या अब लहानमै समाधान हुन्छन्। नाक र घाँटीसम्बन्धी रहेर जटिल अप्रेसन बाहेक अन्य सबै सेवा यहीं उपलब्ध हुनेछ।”
केन्द्रले सेवा पहुँच विस्तारका लागि छुट योजना पनि सार्वजनिक गरेको छ। पाँच वर्षमुनिका बालबालिका र ६० वर्षमाथिका ज्येष्ठ नागरिकलाई बहिरंग सेवामा शतप्रतिशत छुट उपलब्ध हुनेछ। त्यसैगरी मंसिर महिनाभर अन्य बिरामीलाई बहिरंगमा ५० प्रतिशत, सामान्य शल्यक्रियामा ३० प्रतिशत तथा श्रवण यन्त्रमा १५ प्रतिशत छुट लागू हुनेछ।
स्थानीयवासीका अनुसार प्रदेशमै पहिलोपटक आधुनिक उपकरण, अनुभवी विशेषज्ञ र छुटसहितको सेवा एउटै संरचनामा उपलब्ध हुनु लहानका लागि ‘स्वास्थ्य क्षेत्रको महत्त्वपूर्ण उछाल’ हो। बिरामीलाई टाढा सहरसम्म उपचारकै लागि धाउनुपर्ने बाध्यता कम हुने र खर्चमा समेत ठूलो कटौती हुने अपेक्षा गरिएको छ।
निजी क्षेत्रको लगानीमा सुरु भएको ‘सम्पूर्ण कान स्वास्थ्य केन्द्र’ लाई स्थानीय समुदायले मधेसमा गुणस्तरीय र पहुँचयोग्य स्वास्थ्य सेवा विस्तारको नयाँ मोडेलका रूपमा स्वागत गरेका छन्।
