महेश सिंह लहान सिरहा – सप्तरीको खडक नगरपालिका–८ लाई औपचारिक रूपमा बालमैत्री स्थानीय शासनयुक्त वडा घोषणा गरिएको छ। बालमैत्री स्थानीय शासन कार्यान्वयन निर्देशिका २०७८ तथा घोषणा कार्यविधि २०७९ र नगरपालिका कार्यविधि २०८२ बमोजिम आवश्यक तयारी पूरा गरेपछि बिहीबार (मंसिर २५, २०८२ / डिसेम्बर ११, २०२५) विशेष समारोहका बीच घोषणा गरिएको हो।
कार्यक्रममा वडा अध्यक्ष बिन्दु लाल चौधरी, नगर प्रमुख जय प्रकाश चौधरी, प्रशासकीय अधिकृत हरेन्द्र श्रेष्ठ, वडा सदस्यहरू राजेन्द्र चौधरी र देन नारायण चौधरी, तथा महिला तथा बालबालिका शाखा प्रमुख सुशीला चौधरी लगायतको उपस्थिति थियो।
नगरपालिकामा बालमैत्री वातावरण सुदृढ गर्न खडक नगरपालिका, सबल नेपाल सप्तरी र सेभ द चिल्ड्रेन बीचको दीर्घकालीन सहकार्य महत्वपूर्ण रहेको आयोजकले जनाए।
बाल कल्याण अधिकृत अनिता कुमारी साहका अनुसार समग्र नगर क्षेत्रमा हाल ५३ वटा बाल क्लब र ११ वटा वडास्तरिय बाल क्लब संजाल सक्रिय छन्।
त्यसैगरी, वडामा बाल अधिकार समिति, स्तरीय बाल अधिकार समिति तथा स्तरीय बालमैत्री समिति गठन भएर नियमित रूपमा बाल अधिकार संरक्षणका गतिविधि सञ्चालन भइरहेको सबल नेपालका फिल्ड संयोजक अशोक कुमार साहले जानकारी दिनु भयो।
सबल नेपाल सप्तरीको समुन्नति कार्यक्रमअन्तर्गत शिक्षा फिल्ड संयोजक राधेश्याम रामले वडा नं. ८ मा विगत केही वर्षयता निरन्तर जनचेतनामूलक तथा संरचनागत सुधारका गतिविधि सञ्चालन हुँदै आएको बताए।
उनका अनुसार, विद्यालयस्तरीय कार्यक्रम, अभिभावक तथा समुदाय केन्द्रित सचेतना अभियान, तथा बालमैत्री पूर्वाधार विकास गरी वडालाई बालमैत्री मानकमा पुर्याउन महत्वपूर्ण भूमिका खेलेको हो।
यस वडाको सिमाना पूर्वमा खडक–७, पश्चिममा खडक–५, दक्षिणमा बोदेबरसाइन नगरपालिका तथा उत्तरमा त्रियुगा नगरपालिका रहेको क्षेत्रलाई बालमैत्री वडा घोषणा गरिएको छ। घोषणासँगै वडा–८ ले अब बाल अधिकारमैत्री नीति, संरचना र सेवा प्रवर्द्धनका कार्यहरू थप सुदृढ गर्नेछ। बाल संरक्षण, शिक्षा, स्वास्थ्य, सुरक्षासहितका सूचकहरूमा नियमित अनुगमन र सुधारका अभियान सञ्चालन गर्ने प्रतिबद्धता नगरपालिकाले जनाएको छ।
