महेश सिंह लहान,सिरहा –लक्ष्मीपुर पतारी गाउँपालिकाको समन्वयमा राष्ट्रिय कृषक समूह महासंघ नेपाल र केयर नेपालको साझेदारीमा सञ्चालित पोषण कार्यक्रम अन्तर्गत कृषिमा आधारित एकीकृत पोषण बगैँचा सम्बन्धी स्थानीय तहस्तरीय ४ दिने तालिम लहानमा सम्पन्न भएको छ।
“सशक्त, समृद्ध, सम्मानित किसान : सबल महाअभियान” नारासहित मंसिर २३ देखि २६ गतेसम्म लहानस्थित होटल सम्राटमा आयोजना गरिएको तालिममा लक्ष्मीपुर पतारी गाउँपालिका अन्तर्गतका ३१ वटा कृषक समूहका प्रत्येक समूहबाट छनोट गरिएका अगुवा किसानहरूको सहभागिता रहेको थियो।
तालिमको उद्देश्य एकीकृत पोषण बगैँचा स्थापना गरी स्थानीय स्तरमै उत्पादन बढाउँदै समुदायको पोषण अवस्थामा सुधार ल्याउनु रहेको आयोजकले जनाएको छ। तालिममा पोषण संवेदनशील कृषि अभ्यास, घरायसी तथा सामुदायिक स्तरमा पोषण बगैँचा विकास, विविध तरकारी तथा फलफूल उत्पादन, सन्तुलित आहार तथा दिगो कृषिबारे व्यवहारिक ज्ञान प्रदान गरिएको थियो।
कार्यक्रममा राष्ट्रिय कृषक समूह महासंघ नेपालका मधेस प्रदेश सचिव जामुन प्रसाद यादवले तालिमबाट प्राप्त ज्ञान व्यवहारमा लागू गर्न सहभागी किसानहरूलाई आग्रह गरे। उनले सिकाइ व्यवहारमा उतारिए मात्र किसानको जीवनस्तर र उत्पादन प्रणालीमा सकारात्मक परिवर्तन सम्भव हुने बताए।
त्यसैगरी पोषण अधिकृत डिनिता साहले दैनिक जीवनमा आहार र कृषिप्रणालीमा सुधार गर्नुपर्ने आवश्यकता औँल्याउँदै पोषणमैत्री कृषि अभ्यासले परिवार तथा समुदायको स्वास्थ्यमा दीर्घकालीन लाभ पुग्ने जानकारी गराइन्।
विशेषगरी तालिम महिला किसानहरूको क्षमता अभिवृद्धि, आयआर्जनका स्रोतमा पहुँच विस्तार तथा आत्मनिर्भरता सुदृढ गर्ने लक्ष्यसहित सञ्चालन गरिएको आयोजकले जनाएको छ। सहभागीहरूलाई सप्तरीको मौहलीस्थित अर्गानिक खेती अभ्यासबारे समेत जानकारी गराइएको थियो।
कार्यक्रम Nurture Every Future: Poshan Nepal परियोजना अन्तर्गत सञ्चालन गरिएको हो। आयोजकका अनुसार यस्ता तालिमले किसानहरूमा पोषणमैत्री कृषि प्रणालीप्रति चेतना बढाउनुका साथै स्थानीय तहमा दिगो कृषि र पोषण सुरक्षालाई मजबुत बनाउने अपेक्षा गरिएको छ। तालिममा सहभागी किसानहरूले सिकाइ व्यवहारमा उतार्दै आफ्ना गाउँ–टोलमा एकीकृत पोषण बगैँचा विस्तार गर्ने प्रतिबद्धता व्यक्त गरेका छन्।
