महेश सिंह लहान सिरहा-माघी महोत्सवको अवसर पारेर बर्छवा सामुदायिक युवा मञ्चको आयोजनामा १५ औँ पञ्चशील्ड फुटबल प्रतियोगिता २०८२ सुरु भएको छ। प्रतियोगिता क्लबका अध्यक्ष दिलिप चौधरीको नेतृत्वमा आयोजना गरिएको हो।
खेलकुद समितिका संयोजक मुकेश विश्वकर्माको अध्यक्षतामा सुरु भएको उद्घाटन कार्यक्रममा लहान नगरपालिका–२२ का वडा अध्यक्ष श्याम अधिकारी थारु प्रमुख अतिथिका रूपमा सहभागी रहनु भएको थियो। उद्घाटन गर्दै वडा अध्यक्ष थारुले ग्रामीण स्तरमै रहेका खेल प्रतिभालाई राष्ट्रिय स्तरसम्म पुर्याउन यस्ता प्रतियोगिताले महत्वपूर्ण भूमिका खेल्ने बताउनुभयो। उहाँले खेललाई अनुशासित र मर्यादित रूपमा सम्पन्न गर्न खेलाडी तथा आयोजकलाई आग्रह गर्नुभयो।
प्रतियोगिताको उद्घाटन खेलमा **मलिथम एफसी, गाईघाट (उदयपुर)**ले **हेडबान एफसी, फतेपुर (सप्तरी)**लाई २–० गोल अन्तरले पराजित गर्दै विजयी सुरुवात गरेको छ। उक्त खेलमा मलिथम एफसीका जर्सी नम्बर ८ का खेलाडी ‘म्यान अफ द म्याच’ घोषित भएका छन्। उनलाई नगद पुरस्कार र मेडल प्रदान गरिएको सल्लाहकार जयप्रकाश चौधरीले जानकारी दिनुभयो।
आयोजकका अनुसार प्रतियोगितामा सिरहा, सप्तरी, उदयपुर र सुनसरी जिल्लाबाट जम्मा १० वटा टोली सहभागी छन्। खेल हेर्न गाउँ–गाउँबाट ठूलो संख्यामा खेलप्रेमी दर्शकको उपस्थिति रहेको आयोजकले जनाएको छ।
माघी महोत्सव माघ १ र २ गते सञ्चालन हुने र फुटबल प्रतियोगिताको समापन माघ ३ गते हुने क्लब अध्यक्ष दिलिप चौधरीले जानकारी दिनुभयो। माघी महोत्सवका प्रमुख अतिथि संघीय सरकारका खेलकुद मन्त्री बब्लु गुप्ता रहने छन् भने प्रतियोगिताको समापन समारोहका प्रमुख अतिथि लहान नगरपालिकाका नगरप्रमुख महेश प्रसाद चौधरी रहने तय गरिएको आयोजक समितिले जनाएको छ।
प्रतियोगिताको प्रथम पुरस्कार ५१ हजार ५१ रुपैयाँसहित कप र मेडल तथा दोश्रो पुरस्कार ३५ हजार ५१ रुपैयाँसहित कप, मेडल र प्रमाणपत्र राखिएको छ। साथै, प्रत्येक खेलमा म्यान अफ द म्याचलाई नगद पुरस्कार र मेडलको व्यवस्था गरिएको आयोजकले जनाएको छ।
