सप्तरी । प्रतिनिधि सभा निर्वाचन आउन अब चार हप्ता मात्र बाँकी रहँदा सप्तरी निर्वाचन क्षेत्र नम्बर–२ मा चुनावी सरगर्मी तीव्र बन्दै गएको छ। यस क्षेत्रबाट जनमत पार्टीका अध्यक्ष डा. सीके राउत उम्मेदवार बनेसँगै यहाँको राजनीतिक माहोल थप तातेको देखिन्छ।
‘निकास र विकास’लाई मुख्य एजेन्डा बनाएर घरदैलो अभियानमा सक्रिय डा. राउतप्रति जनसमर्थन उल्लेख्य रूपमा बढ्दै गएको स्थानीयहरू बताउँछन्। लामो समयदेखि उपेक्षा, विभेद र अविकासको चक्रमा परेको सप्तरी–२ का मतदाताले यसपटक वैकल्पिक, दूरदर्शी र परिणाममुखी नेतृत्वको खोजी गरिरहेका छन्। यही चाहनालाई सम्बोधन गर्दै डा. राउतले शिक्षा, स्वास्थ्य, रोजगारी, कृषिको आधुनिकीकरण र सुशासनलाई आफ्नो चुनावी प्राथमिकतामा राखेका छन्।
विगतमा मधेश आन्दोलनदेखि जनअधिकार र पहिचानका सवाल उठाउँदै आएका डा. राउत अहिले विकास र स्थायित्वको स्पष्ट खाकासहित जनतामाझ प्रस्तुत भइरहेका छन्। घरदैलो अभियानका क्रममा उनले वृद्ध, महिला, युवा, किसान, मजदुर तथा बुद्धिजीवीसँग प्रत्यक्ष संवाद गर्दै स्थानीय समस्या टिपोट गर्ने र समाधानका स्पष्ट प्रतिबद्धता व्यक्त गर्ने शैली अपनाएका छन्।
“पहिले नेताहरू चुनावमा मात्र देखिन्थे, तर डा. राउतले हाम्रो घरमै आएर कुरा सुन्नुभयो,” एक स्थानीय मतदाताले बताए।
विशेषगरी युवापुस्तामाझ डा. राउतप्रतिको आकर्षण तीव्र देखिन्छ। विदेश पलायन रोक्न स्वदेशमै रोजगारी सिर्जना, सीपमूलक शिक्षा र उद्यमशीलता प्रवर्द्धन गर्ने उनको योजनाले युवालाई उत्साहित बनाएको छ। महिलाहरू पनि शिक्षा, स्वास्थ्य र आत्मनिर्भरता सम्बन्धी एजेन्डाबाट प्रभावित देखिएका छन्।
राजनीतिक विश्लेषकहरूका अनुसार सप्तरी–२ मा परम्परागत दलहरूप्रति बढ्दो निराशा र असन्तुष्टिको फाइदा जनमत पार्टीले उठाइरहेको छ। स्पष्ट विचार, संघर्षको इतिहास र संगठनात्मक सक्रियताले डा. राउतलाई बलियो बनाएको उनीहरूको ठम्याइ छ। विभिन्न समुदाय, वर्ग र पेशाका व्यक्तिहरू जनमत पार्टीमा प्रवेश गर्ने क्रम बढ्दै जानुले चुनावी माहोल थप डा. राउतको पक्षमा मोडिँदै गएको देखिन्छ।
चुनावी प्रचारप्रसार अन्तिम चरणतर्फ उन्मुख भइरहँदा जनमत पार्टी सशक्त संगठन, जनआधारित अभियान र वैचारिक स्पष्टतासहित मैदानमा उत्रिएको छ। “अब भाषण होइन, समाधान चाहिन्छ” भन्ने जनभावनालाई आत्मसात् गर्दै अघि बढिरहेका डा. सीके राउत सप्तरी–२ मा परिवर्तनको आशा र विश्वासका रूपमा स्थापित हुँदै गएका छन्। मौजुदा परिस्थितिमा उनको समर्थन निरन्तर बढ्दो देखिँदा यस निर्वाचनमा जनमत पार्टी निर्णायक शक्तिका रूपमा उदाउने सम्भावना बलियो बन्दै गएको छ।
