महेश सिंह लहान सिरहा –लोटस युनिक एकेडेमी, लहान–३ ले राष्ट्रिय प्रजातन्त्र दिवस २०८२ को अवसरमा प्रभातफेरीसहित बृहत जनचेतनामूलक कार्यक्रम आयोजना गरेको छ।
विद्यालयका अनुसार दिवसको उपलक्ष्यमा आयोजित प्रभातफेरीमा सयौं विद्यार्थीको सहभागिता रहेको थियो। विद्यार्थीहरूले हातमा प्लेकार्ड बोकी लहान बजार तथा आसपासका ग्रामीण क्षेत्रमा परिक्रमा गर्दै प्रजातन्त्रको महत्वबारे सन्देश प्रवाह गरेका थिए।
प्रभातफेरीका क्रममा “राष्ट्र, धर्म र जनताको सम्मान — राष्ट्रिय प्रजातन्त्र हाम्रो अभियान”, “सुशासन, समृद्धि र स्वाभिमान — राष्ट्रिय प्रजातन्त्रको पहिचान” र “राजनीतिमा शुचिता र स्थायित्व — राष्ट्रिय प्रजातन्त्रको प्रतिबद्धता” जस्ता नारा घन्किएका थिए।
विद्यालयका प्रिन्सिपल लक्ष्मण चौधरीले विद्यार्थीमा लोकतान्त्रिक मूल्य–मान्यता, नागरिक कर्तव्यबोध र राष्ट्रिय चेतना अभिवृद्धि गर्ने उद्देश्यले हरेक वर्ष यस्ता कार्यक्रम आयोजना गरिँदै आएको बताए। उनका अनुसार किताबी शिक्षासँगै सामाजिक तथा राष्ट्रिय विषयमा सचेत बनाउनु विद्यालयको दायित्व हो।
कार्यक्रमले केही समय लहान बजार क्षेत्र लोकतान्त्रिक नाराले गुन्जायमान बनेको थियो। सहभागी शिक्षक, अभिभावक तथा स्थानीयवासीले यस्ता कार्यक्रमले विद्यार्थीमा सकारात्मक सोच र जिम्मेवार नागरिक बन्ने संस्कार विकास गर्न सहयोग पुग्ने बताएका छन्।
