काठमाडौँ ।नोएल टाटा टाटा ट्रस्टको नयाँ अध्यक्षमा चयन भएका छन्, जसले समूहको भविष्यको नेतृत्व गर्ने जिम्मेवारी पाएका छन्। रतन टाटाको निधनपछि टाटा समूहमा यो ठूलो परिवर्तन आएको हो। ६७ वर्षीय नोएल टाटा रतन टाटाका सौतेनी भाइ हुन् र यसअघिदेखि नै टाटा सन्ससँग सम्बन्धित विभिन्न जिम्मेवारीहरू सम्हालिरहेका थिए।
रतन टाटाको बुधबार राति मुम्बईमा भएको निधनपछि शुक्रबार बसेको सञ्चालक समितिको बैठकमा सर्वसम्मतिले नोएललाई अध्यक्षको जिम्मेवारी दिइएको हो। टाटा समूह हाल करिब ३४ लाख करोड रुपैयाँको हो, जसको नेतृत्व अब नोएलले गर्नेछन्।
टाटा ट्रस्टले प्रेस विज्ञप्तिमार्फत नोएल टाटाको अध्यक्षमा नियुक्तिको औपचारिक घोषणा गर्दै उक्त निर्णय तुरुन्त लागू हुने जानकारी दिएको छ। नोएल टाटा यसअघिदेखि नै भोल्टास र टाटा इन्भेस्टमेन्ट कर्पोरेसनका अध्यक्ष रहिसकेका छन्। उनी २०१० देखि २०२१ सम्म टाटा इन्टरनेसनल लिमिटेडका प्रबन्ध निर्देशक पनि थिए।
नोएलको नेतृत्वमा टाटा समूहले आगामी दिनमा नयाँ दिशा र उचाइ हासिल गर्ने अपेक्षा गरिएको छ।
