काठमाडौँ। पश्चिमी वायु र स्थानीय वायुले नेपालका विभिन्न क्षेत्रमा आंशिक असर पुर्याइरहेको छ। लुम्बिनी, सुदूरपश्चिम, र कर्णाली प्रदेशमा पश्चिमी वायुको हल्का प्रभाव देखिएको छ भने कोशी, मधेश, बागमती, र गण्डकी प्रदेशमा आंशिक बदली भएको जल तथा मौसम विज्ञान विभागले जनाएको छ।
विभागको बुलेटिनअनुसार, हाल कोशी, बागमती र गण्डकी प्रदेशमा आंशिकदेखि सामान्य बदलीको अवस्था छ। सुदूरपश्चिम र कर्णाली प्रदेशका पहाडी भूभागमा हल्कादेखि मध्यम बदली हुने सम्भावना रहेको छ।
दिउँसोको समयमा कोशी, बागमती र गण्डकी प्रदेशमा आंशिक बदली रहँदा मौसम मुख्यतया सफा रहने अपेक्षा गरिएको छ। यद्यपि, पहाडी क्षेत्रका केही स्थानहरूमा मेघ गर्जन र चट्याङ्गसहित हल्का वर्षा हुने सम्भावना छ।
रातिको समयमा पनि कोशी र गण्डकी प्रदेशका केही पहाडी स्थानहरूमा हल्का वर्षा हुनसक्ने अनुमान गरिएको छ।
सोमबार (असोज २८) मा पनि कोशी, बागमती र गण्डकी प्रदेशमा आंशिकदेखि सामान्य बदली कायम रहने र केही स्थानहरूमा हल्का वर्षा हुने सम्भावना महाशाखाले जनाएको छ।
