सप्तरी ।सप्तरी जिल्लाको हुलाकी राजमार्ग अन्तर्गत राजविराज–कञ्चनपुर जोड्ने अग्निसाइरकृष्ण सवरण गाउँपालिका–४, बनौलीस्थित कालिया खोलामा निर्माणाधीन पुल वर्षौँदेखि अलपत्र छ। पुल नबन्दा स्थानीय बासिन्दा र यात्रुहरूलाई आवतजावतमा ठूलो कठिनाइ झेल्नुपरेको छ।
२०७१ सालमा लामा बागमती निर्माण सेवाले पुल निर्माणको काम थालनी गरे पनि, काम ढिलो हुँदै आएको छ। यसले गर्दा सयौँ सवारीसाधन र स्थानीयहरूलाई खोला तरेर जोखिमपूर्ण यात्रा गर्नुपर्ने बाध्यता छ। स्थानीय पिन्टु यादवका अनुसार, सदरमुकाम राजविराजलाई पनि जोड्ने उक्त पुल नबन्दा हजारौँ मानिसले दैनिक रूपमा जोखिम मोलेर यात्रा गरिरहेका छन्।
तिरहुत गाउँपालिका–३ का बुधिलाल अरगारिया यादवले वर्षाको समयमा खोलामा बाढी आउँदा यात्रा थप कठिन हुने गरेको बताए। “वर्षा हुँदा खोला तर्ने कुनै विकल्प नहुँदा चारपाङ्ग्रे र दुईपाङ्ग्रे सवारीसाधनको आवागमन पूर्ण रूपमा बन्द हुन्छ,” उनले भने। यसले महेन्द्र राजमार्ग जोड्ने तिरहुत गाउँपालिका, कञ्चरुप नगरपालिका, सप्तकोसी नगरपालिका र उदयपुर जिल्लासम्मका सवारी साधनलाई समेत असर पुर्याएको छ।
त्यस्तै, पुलसँग जोडिएको करिब दुई किलोमिटर सडक अझै कालोपत्रे हुन नसकेकाले यातायातमा थप समस्या आएको छ। बज्रगुरु निर्माण सेवा जेभीले उक्त सडकको ठेक्का लिएको भए पनि ढिलाइ भइरहेको छ। यसैगरी, तिरहुत गाउँपालिका–५, बुधेवामा निर्माण भएको पुलसँग जोडिएको एक किलोमिटर सडक कालोपत्रे गर्न ढिलाइ भएको स्थानीय देवनारायण यादवले गुनासो गरे।
रासस
