लहान– नेशनल लघुवित्त वित्तीय संस्था लिमिटेडले सिरहा जिल्लाको बरियारपट्टि गाउँपालिकामा रहेका दुई विद्यालयका विद्यार्थीहरूलाई शैक्षिक सामग्री वितरण गरेको छ। सामाजिक उत्तरदायित्व अन्तर्गत, सरस्वती आधारभूत विद्यालय र जनता आधारभूत विद्यालयमा अध्ययनरत ३४० विद्यार्थीहरूलाई झोला, विद्यालय पोशाक, कपी र कलम वितरण गरिएको हो।
संस्थाले सरस्वती आधारभूत विद्यालयलाई ३०० थान र जनता आधारभूत विद्यालयलाई ४० थान झोला वितरण गरेको जानकारी अनुगमन अधिकृत आशाराम यादवले दिए। कुल ६ लाख रुपैयाँ बराबरको शैक्षिक सामग्री वितरण गरिएको उक्त कार्यक्रममा बरियारपट्टि गाउँपालिकाका अध्यक्ष संतोष महतोको अध्यक्षता रहेको थियो भने नेशनल लघुवित्तका सिईओ तथा राष्ट्रिय बैंकर संघका अध्यक्ष राम बहादुर यादव प्रमुख अतिथिका रूपमा सहभागी थिए।
कार्यक्रममा वडा नं. १ का अध्यक्ष देवेन्द्र यादवसहित स्थानीय जनप्रतिनिधिहरू र लघुवित्तका विभिन्न शाखा प्रमुखहरूको उपस्थिति रहेको थियो। कार्यक्रमको आयोजना नेशनल लघुवित्तको बरियारपट्टि शाखा र सरस्वती आधारभूत विद्यालयको संयुक्त पहलमा भएको हो।
