कञ्चनपुर।कञ्चनपुरको शुक्लाफाँटा नगरपालिका–३ की २५ वर्षीया जानकी बाँनियालाई वर्षौंसम्म बन्द कोठामा थुनेर राखिएको अवस्थामा उद्धार गरिएको छ। नगर उपप्रमुख कल्पना पन्तको नेतृत्वमा गरिएको यो अभियानपछि जानकीलाई मानव सेवा आश्रम, धनगढीमा पठाइएको छ।
चौध–पन्ध्र वर्षकै उमेरदेखि मानसिक सन्तुलन गुमाएकी जानकीलाई विभिन्न उपचार असफल भएपछि परिवारले कोठामा थुनेर राख्दै आएको थियो। उद्धारका क्रममा अत्यधिक कमजोर अवस्थामा भेटिएकी जानकीले बोल्न कठिनाइ महसुस गरिरहेकी थिइन्। पर्याप्त आहार र व्यक्तिगत हेरचाहको अभावले उनको अवस्था दयनीय बनेको देखिएको छ।
नगरपालिकाले प्रदान गर्ने पूर्ण अपाङ्गता भत्ताको रकम प्राप्त भए पनि जानकीको उचित देखभालमा परिवारले ध्यान नदिएकोले उनलाई मानव सेवा आश्रममा पुर्याउनु परेको उपप्रमुख पन्तले जानकारी दिएकी छन्। जानकीलाई तीन महिनासम्म आश्रममा राखेर उपचार गरिने र त्यसपछि पुनः परिवारलाई जिम्मा लगाइने योजना बनाइएको छ।
