काठमाण्डौ – प्रेस काउन्सिल नेपालले पत्रकार आचारसंहिताविपरीत समाचार सम्प्रेषण गरेको भन्दै चार सञ्चार माध्यमलाई कालोसूचीमा राख्ने र एक युट्युब च्यानललाई कानुनी कारबाहीको सिफारिस गरेको छ। काउन्सिलले पेसागत आचरण उल्लंघन गर्दै आएको उजुरीका आधारमा सञ्चार माध्यमहरूको अनुगमन गर्दै आचारसंहिता उल्लंघन गर्ने सञ्चार संस्थाहरूविरुद्ध यो कदम चालेको हो।
काउन्सिलको आचारसंहिता अनुगमन उपसमितिको बैठकले “त्रिनेत्रपोष्ट साप्ताहिक,” “योहो टेलिभिजन,” “कोशीपोष्ट डटकम,” र “खोजतलास अनलाइन”लाई कालोसूचीमा राखी थप कारबाही प्रक्रिया अघि बढाउने निर्णय गरेको छ। यसरी कालोसूचीमा पर्ने सञ्चार माध्यमहरूको संख्या चालू आर्थिक वर्षमा सात पुगेको छ।
त्यस्तै, सात सञ्चार माध्यमलाई विशेष अनुगमनमा राख्ने निर्णयसमेत बैठकले गरेको छ। विशेष अनुगमनमा परेका सञ्चार माध्यमहरूमा “दियोपोष्ट डटकम,” “मोटिभेट न्यूज,” “ए वन नेपाल न्यूज,” “अनलाइन टीभी नेपाल,” “राइट सञ्चार,” “ताजाखबर टिभी,” र “बीजीटीभी युट्युब च्यानल” रहेका छन्।
काउन्सिलले सञ्चार माध्यमको नामको दुरुपयोग गर्दै एकपक्षीय, तथ्यहीन समाचार सम्प्रेषण गर्ने, तथा आचारसंहिताविपरीत गतिविधि गर्ने युट्युब च्यानल “पूर्वाञ्चल डिबीआर टिभी”लाई कारबाहीको लागि साइबर ब्युरोमा पत्राचार गरेको छ।
प्रेस काउन्सिल नेपालले सबै सञ्चार माध्यम र पत्रकारलाई सत्य, तथ्य र सन्तुलित समाचार सम्प्रेषण गर्न र समाजमा भ्रम तथा उत्तेजना फैलाउने गलत सामग्री प्रकाशन नगर्न विशेष आग्रह गरेको छ।
