लहान – सिरहाको नवराजपुर गाउँपालिका–१ भगवतीपुरकी १७ वर्षीया किशोरी रिंकु सदा मृत्यु प्रकरणका मुख्य आरोपी रुपेश मण्डललाई २४ दिनपछि प्रहरीले भारतबाट पक्राउ गरेको छ। विशेष प्रहरी टोलीको निगरानीपछि उनलाई नियन्त्रणमा लिइएको हो।
माघ २७ गते राति करिब ७ बजे शौच गर्न बाहिर गएकी रिंकु राति ३ बजे फर्केर रोइरहेको अवस्थामा भेटिएकी थिइन्। जब अभिभावकले सोधपुछ गरे, उनले बलात्कार भएको बयान दिएकी थिइन्। यस घटनापछि माघ ३० गते उनी आफ्नै घरमा झुण्डिएको अवस्थामा मृत फेला परिन्।
रिंकुको मृत्यु शंकास्पद रहेको भन्दै परिवारले न्यायको माग गरेका थिए। घटनापछि प्रहरी अनुसन्धान अघि बढे पनि मुख्य आरोपी फरार थिए। स्थानीयस्तरमा दबाब बढ्दै गएपछि प्रहरीले खोजी तीव्र बनाएको थियो।
प्रहरी स्रोतका अनुसार रुपेश मण्डल भारतमा लुकेर बसेका थिए। निगरानीपछि उनलाई पक्राउ गरी नेपाल ल्याइएको हो। प्रहरीले उनलाई सिरहा जिल्ला अदालतमा उपस्थित गराई म्याद थप गरी थप अनुसन्धान अघि बढाउने तयारी गरिरहेको छ।
घटनाले स्थानीय क्षेत्रमा व्यापक चर्चा पाएको छ। नागरिक समाज, अधिकारकर्मी र स्थानीयवासीहरूले पीडित परिवारलाई न्याय दिलाउन गम्भीर छानबिन र दोषीलाई कडा कारबाही हुनुपर्ने माग गरेका छन्। अब प्रहरीले अनुसन्धानलाई निष्पक्षरूपमा अघि बढाएर सत्यतथ्य बाहिर ल्याउने अपेक्षा गरिएको छ।
