सिरहा १२ बैशाख– सिरहा जिल्लाको नवराजपुर गाउँपालिका–२ मा बुधवार राति अज्ञात समूहले विद्युतीय ट्रान्सफर्मर चोरी गर्दै करिब दुई लाख रुपैयाँ बराबरको सामान लुटपाट गरेका छन्।
स्थानीय रामपुजन मुखियाका अनुसार करिब चार वर्षअघि कमला सिचाइ योजनाअन्तर्गत ५० किलोवाटको ट्रान्सफर्मर जडान गरिएको थियो। पूर्व वडा अध्यक्ष खुशीलाल साहको पहलमा उपभोक्ता समूहमार्फत १ करोड रुपैयाँभन्दा बढीको लागतमा उक्त योजना सञ्चालनमा ल्याइएको थियो। तर, विभिन्न कारणले योजना निष्क्रिय रहँदै आएको थियो।
बैशाख १० गते राति ट्रान्सफर्मर तोडफोड गरी तामा तारसहित गहुँ, धान, चामललगायत सामग्री लुटिएको जनाइएको छ। लुटिएको सम्पत्तिको अनुमानित मूल्य करिब दुई लाख रुपैयाँ रहेको छ।
यो घटना पूर्व वडा अध्यक्ष यादव फर्जी नागरिकता सिफारिसको आरोपमा पक्राउ परेको एक साताभित्रै भएको हो। उपभोक्ता समितिका केही सदस्य, विशेषतः महिलाहरूले हालका वडा अध्यक्ष सुरेश कुमार यादवमाथि संलग्नताको आरोप लगाएका छन्।
वडा अध्यक्ष यादवले भने आफू निर्दोष रहेको बताउँदै निष्पक्ष र गहिरो अनुसन्धानको माग गरेका छन्। “दोषी ठहरिए कानुनी सजाय भोग्न तयार छु,” उनको भनाइ छ।
प्रहरीले घटनाको अनुसन्धान अघि बढाएको जनाएको छ।
