काठमाडौं ।राजसंस्था पुनर्स्थापना संयुक्त जनआन्दोलन समिति’ का ‘जनकमान्डर’ दुर्गा प्रसाईंमाथि नेपाल प्रहरीको केन्द्रीय अनुसन्धान ब्युरो (CIB) ले बैंकिङ कसुर र सम्पत्ति शुद्धीकरणमा अनुसन्धान गरिरहेको छ। उनी हाल काठमाडौं जिल्ला प्रहरी परिसरको हिरासतमा छन्।
प्रसाईं र उनको परिवारले २५ वटा संस्थामार्फत ९ वटा बैंक तथा वित्तीय संस्थाबाट ७ अर्ब २५ करोड ८७ लाख रुपैयाँ ऋण लिएको र त्यो रकम दुरूपयोग गरी अन्य प्रयोजनमा खर्च गरेको खुलेको छ। ऋण लिएको रकम एक ठाउँको तिर्न अर्को ठाउँको भुक्तानीमा प्रयोग गरेको पाइएपछि अनुसन्धान गरिएको हो।
उनले बिएण्डसी मेडिकल कलेज र पूर्वाञ्चल क्यान्सर हस्पिटलका नाममा लिएको कर्जा समयमा भुक्तानी नगरेको, परियोजनाको लागत बढाएर बढी कर्जा लिएको, र राउन्ड ट्रिपिङ तथा रिलेटेड पार्टी ट्रान्जाक्सनजस्ता शंकास्पद कारोबार गरेको प्रारम्भिक अनुसन्धानले देखाएको छ।
नेपाल राष्ट्र बैंकले बैंकिङ कसुर तथा सजाय ऐन, २०६४ र सम्पत्ति शुद्धीकरण निवारण ऐन, २०६४ अनुसार अनुसन्धान गर्न पत्राचार गरेको थियो।
प्रसाईंमाथि बैंकिङ कसुरमा तोकिएको बिगो अनुसार जरिवाना र कैद सजाय माग हुनेछ। यदि बिगो एक अर्बभन्दा बढी भए १० देखि १२ वर्षसम्म कैद सजाय माग गर्न सकिने व्यवस्था छ।
यसैबीच, प्रसाईंविरुद्ध जिल्ला प्रहरी परिसर काठमाडौंमा ज्यान मार्ने उद्योग, राज्यविरुद्धको कसुर र संगठित अपराधसमेतको अनुसन्धान भइरहेको छ।
