लहान :सिरहाको लहान नगरपालिका–३ दंग्राहा टोलमा मोटरसाइकलले छोएको निहुँमा एक युवकमाथि खुकुरी प्रहार गरिएको छ। २७ वर्षीय देवकुमार महतोमाथि बुधबार भएको कुटपिट तथा खुकुरी प्रहारबाट उनी घाइते भएका छन्।
घाइते महतोको प्रादेशिक अस्पताल सिरहामा उपचार भइरहेको जिल्ला प्रहरी कार्यालय सिरहाका प्रवक्ता डिएसपी विरेन्द्रकुमार पासवानले जानकारी दिए। उनको टाउको, घाँटी र ढाडमा चोट लागेको छ। अवस्था भने सामान्य रहेको अस्पतालका चिकित्सकलाई उद्धृत गर्दै प्रहरीले जनाएको छ।
घटनामा संलग्न ६२ वर्षीय जिवछ महतोसहित उनका परिवारका तीन जनालाई प्रहरीले पक्राउ गरेको छ। खुकुरी प्रहार गर्ने एक जना भने फरार छन्। प्रहरीले जिवछ महतोसँगै उनकी ६० वर्षीया श्रीमती सीतादेवी महतो र २१ वर्षीय छोरा मनिष महतोलाई पक्राउ गरेको हो। खुकुरी प्रहार गर्ने जिवछका १९ वर्षीय छोरा मुकेश महतो भने फरार रहेको डिएसपी पासवानले जानकारी दिए।
प्रहरीका अनुसार जिवछका छोरा मनिषले चलाइरहेको मोटरसाइकलले स्थानीय नथुनी महतोका छोरा देवकुमारलाई छोएपछि विवाद भएको थियो। त्यसपछि जिवछ महतोका परिवारका सदस्यहरू मिलेर देवकुमारलाई कुटपिट गरेका थिए।
यो घटना बुधबारको भए पनि ढिलोमात्र सार्वजनिक भएको हो। प्राप्त घटनास्थलको भिडियोमा मुकेशले पटक–पटक देवकुमारमाथि प्रहार गरेको देखिन्छ।
पीडित पक्षबाट आक्रमण गर्नेहरू विरुद्ध इलाका प्रहरी कार्यालय लहानमा ज्यान मार्ने उद्योगमा जाहेरी परेको थियो। त्यसपछि प्रहरीले घटनामा संलग्न जिवछसहित तीन जनालाई नियन्त्रणमा लिएर इलाका प्रहरी कार्यालय लहानको हिरासतमा राखेको छ। फरार रहेका मुकेशको खोजी भइरहेको प्रहरीले जनाएको छ।
