काठमाडौं । नेपाली कांग्रेसका नेता एवं पूर्वमन्त्री मोहम्मद अफताब आलमको शनिबार बिहान २:५९ बजे निधन भएको छ। मस्तिष्कघातपछि दुबै मिर्गौला फेल भएका कारण उनको काठमाडौं मेडिकल कलेज (केएमसी) मा उपचारका क्रममा मृत्यु भएको केएमसीका प्रमुख प्रशासकीय अधिकृत नारायण दाहालले जानकारी दिएका छन्।
आलम तिहारअघिदेखि भेन्टिलेटरमा उपचाररत् थिए। उनलाई दसैँअघिदेखि अस्पतालमा भर्ना गरिएको थियो।
विसं २०५१ को उपनिर्वाचनबाट पहिलोपटक सांसद बनेका आलम २०५४ मा श्रम राज्यमन्त्री र २०५५ मा वन राज्यमन्त्री भएका थिए। त्यसपछि उनी भूमि सुधार तथा श्रम–यातायातमन्त्रीसमेत बनेका थिए।
२०६४ सालको संविधानसभा निर्वाचनअघि रौतहटमा भएको बम विस्फोटमा संलग्न रहेको आरोपमा जन्मकैदको फैसला भई लामो समय कारागारमा रहेका आलम गत जेठ १४ गते रौतहट जिल्ला अदालतको आदेशपछि मुक्त भएका थिए। त्यसपछि उनलाई ब्रेन स्ट्रोक भएको थियो।
पूर्वमन्त्री आलमका दुई छोरा र एक छोरी छन्।
