महेश सिंह लहान सिरहा –डा.सिके राउत नेतृत्वको जनमत पार्टी जिल्ला कार्य समिति सिरहाले मंसिर १० गते रंगभेद विरोधी एकता दिवस भव्य र उत्साहपूर्ण माहोलमा मनाएको छ। प्रदेशभरबाट आएका हजारौँ नेता तथा कार्यकर्ताहरूको उपस्थितिमा कार्यक्रम सम्पन्न भएको खुशबु जेस्वालले जानकारी दिएकी छन्।
कार्यक्रममा सहभागीहरूले “मधेसीलाई भैया भन्न पाइँदैन”, “मधेसी हेप्न पाइँदैन”, “सम्पूर्ण नागरिक बराबरी”, “पहिचानको सम्मान, अधिकारको रक्षा” लगायत दर्जनौँ नारासहित जातीय विभेद, भाषिक अपमान तथा सामाजिक अन्यायका विरुद्ध आवाज उठाएका थिए।
जनमत पार्टीले मधेसमा देखिँदै आएको विभेदमूलक व्यवहार, अपमानजनक शब्दको प्रयोग र पहिचानमाथिको अतिक्रमणप्रति कडा आपत्ति जनाउँदै, रंगभेदविरोधी एकता दिवसले समानता, स्वाभिमान र पहिचानका सवालमा समाजलाई सचेत बनाउने महत्वपूर्ण भूमिका खेलेको जनाएको छ।
नेता तथा कार्यकर्ताहरूले मधेसी समुदायका अधिकार, सम्मान र स्वाभिमानका विषयमा जनमत पार्टी निरन्तर अग्रसर रहने प्रतिवद्धता व्यक्त गर्दै, विभेदविहीन समाज निर्माण अभियानलाई अझै सशक्त बनाइने बताएका छन्।
सिरहामा सम्पन्न यो कार्यक्रमले स्थानीयस्तरमा पहिचान, अधिकार र सम्मानका मुद्दालाई अघि बढाउँदै सामाजिक एकता तथा सचेतनालाई थप मजबुत बनाएको जनाइएको छ।
