काठमाडौँ २२ चैत। नेपाल सरकारले सरकारी कार्यालयहरूको कार्य समय परिवर्तन गर्दै हप्तामा दुई दिन सार्वजनिक बिदा दिने निर्णय गरेको छ। आइतबार बसेको मन्त्रिपरिषद् बैठकले शैक्षिक संस्थाबाहेकका सबै सरकारी कार्यालय बिहान ९ बजेदेखि साँझ ५ बजेसम्म सञ्चालन हुने व्यवस्था गरेको हो।
सरकारका प्रवक्ता तथा शिक्षामन्त्री सस्मित पोखरेलले भने, “शैक्षिक संस्थाबाहेकका कार्यालयहरू अब ९ देखि ५ बजेसम्म सञ्चालन हुने व्यवस्था गरिएको छ।” यसअघि कार्यालयहरू १० बजे खुल्ने गर्थे, अब एक घण्टा अगाडि खोलिँदा कामकाजमा सहजता आउँने अपेक्षा गरिएको छ।
त्यस्तै, सरकारले आगामी चैत २३ गतेदेखि लागू हुने गरी शनिबार र आइतबार दुबै दिन सरकारी कार्यालय र शैक्षिक संस्थामा सार्वजनिक बिदा दिने निर्णय गरेको छ। सरकारले यस्तो कदम इन्धन खपत घटाउने र खर्च व्यवस्थापनलाई सहज बनाउने उद्देश्यले चालेको जनाएको छ।
