लहान ।,भूमिहीन दलित, भूमिहीन सुकुम्बासी तथा अव्यवस्थित बसोबासीहरूको व्यवस्थापन सम्बन्धी विषयलाई केन्द्रमा राखेर सिरहामा पत्रकार सम्मेलन सम्पन्न भएको छ।
नेपाल महिला एकता समाज, सामुदायिक आत्मनिर्भर केन्द्र (CSRC) र जिल्ला भूमि अधिकार मञ्च सिरहाको संयुक्त आयोजनामा भएको पत्रकार सम्मेलनमा भूमिहीन तथा अव्यवस्थित बसोबासी नागरिकहरूको समस्या, भूमि अधिकार तथा राज्यबाट प्राप्त हुनुपर्ने सेवासुविधाका विषयमा धारणा सार्वजनिक गरिएको एकता महिला समाजका प्रतिनिधि सरस्वती शर्माले जानकारी दिनु भयो।
सम्मेलनमा वक्ताहरूले वर्षौंदेखि भूमि स्वामित्वबाट वञ्चित रहेका दलित, सुकुम्बासी तथा अव्यवस्थित बसोबासीहरूको पहिचान गरी उनीहरूलाई कानुनअनुसार जग्गाको स्वामित्व उपलब्ध गराउन सरकार गम्भीर हुनुपर्ने बताए। उनीहरूले भूमि सम्बन्धी समस्या समाधानका लागि स्थानीय तह, राष्ट्रिय भूमि आयोग र सरोकारवाला निकायबीच प्रभावकारी समन्वय आवश्यक रहेको उल्लेख गरे।
कार्यक्रममा भूमि अधिकारका क्षेत्रमा कार्यरत संघसंस्था, अधिकारकर्मी तथा सञ्चारकर्मीहरूको सहभागिता रहेको थियो। सहभागीहरूले भूमिहीन नागरिकहरूको सम्मानजनक जीवन र सामाजिक न्यायका लागि भूमि अधिकार सुनिश्चित गर्नुपर्नेमा जोड दिएका थिए।
आयोजक संस्थाहरूले भूमिहीन दलित, सुकुम्बासी तथा अव्यवस्थित बसोबासीहरूको हकअधिकार स्थापित गर्न निरन्तर आवाज उठाइरहने प्रतिबद्धता व्यक्त गरेका छन्।
