प्रदिप सिंह
लहान १२ असार ।गोल्डेन फ्युचर एजुकेशनल एकेडेमीले प्रत्येक वर्ष नयाँ विद्यार्थीलाई स्वागत गर्ने कार्यक्रम आयोजना गर्दै आएको छ। सिराहाको लहान नगरपालिका–२ स्थित रहेको विद्यालयले यस वर्ष पनि शैक्षिक सत्र २०८३ मा भर्ना भएका नयाँ विद्यार्थीलाई टीका, फूलको माला लगाई तथा सांस्कृतिक कार्यक्रममार्फत आत्मीय स्वागत गरेको छ।
विद्यालयले हरेक वर्ष यस्ता स्वागत कार्यक्रम आयोजना गर्दै आएको र नयाँ विद्यार्थीलाई विद्यालयसँग घुलमिल हुन सहज बनाउने उद्देश्य रहेको यसै विद्यालयका नेपाली शिक्षक राकेश सिंहले जानकारी दिनुभयो।
२०६९ सालमा स्थापना भएको यस विद्यालयमा हाल करिब ४०० विद्यार्थी अध्ययनरत छन्। यस वर्ष नर्सरीदेखि कक्षा ९ सम्म ११२ जना नयाँ विद्यार्थी भर्ना भएको विद्यालयले जनाएको छ।
विद्यार्थीको मनोबल अभिवृद्धि गर्ने तथा विद्यालयप्रति अपनत्वको भावना विकास गर्ने उद्देश्यले यस्ता कार्यक्रम हरेक वर्ष आयोजना गर्दै आएको प्रधानाध्यापक उपेन्द्रप्रसाद यादवले जानकारी दिनुभयो।
