सर्लाहीमा मोटरसाइकल अनियन्त्रित भएर पुलमा ठक्कर दिई तल झर्दा दुईजनाको मृत्यु भएको छ ।
दुर्घटनामा परेर महोत्तरीको औरही नगरपालिका–१ का ३२ वर्षीय चन्दन कुमार साह र सर्लाहीको कविलासी नगरपालिका–२ पिपरियाका २५ वर्षीय राम विश्वास मण्डलको मृत्यु भएको हो ।
बुधवार विहान जिल्लाको ईश्वरपुर नगरपालिका–१३ अमुवा खोला स्थित भित्रि सडक खण्डमा गौरीशंकरबाट बयलबास तर्फ जाँदै गरेको ज ११ प ८९४५ नम्बरको मोटरसाइकल आफै अनियन्त्रित भएर पुलमा ठक्कर दिएर तल झरेकोमा सावा ९ बजे स्थानीयहरुले देखेपछि प्रहरीलाई खबर गरेको जिल्ला प्रहरी कार्यालय सर्लाहीले जनाएको छ ।
मोटरसाइकल पुलको दाहिने साइडमा ठक्कर दिँदा पुलबाट ५ मिटर तल खसेको थियो ।
पोस्टमार्टमका लागि दुबैजनाको शवलाई प्रादेशिक अस्पताल सर्लाही पठाईएको तथा यस सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीका प्रहरी निरीक्षक जटाशंकर यादवले जानकारी दिए ।
