काठमाडौँ ।दशैंमा जब अधिकांश नेपाली नागरिक आफ्नो परिवार र साथीहरूसँग रमाइलो गर्दै हुन्छन्, प्रहरी भने सुरक्षाको कडा जिम्मेवारीमा व्यस्त रहन्छन्। अपराधी समूहहरूले चाडपर्वलाई आफ्नो अवसरका रूपमा प्रयोग गर्ने भएकाले, प्रहरी चौबीसै घण्टा सुरक्षा व्यवस्थापनमा खटिएका हुन्छन्।
७७ वटै जिल्लामा अपराध नियन्त्रण गर्नका लागि विशेष सुरक्षा योजना लागू गरिन्छ, जसमा मदिरा बिक्रीदेखि चोरी, लुटपाटजस्ता अपराध रोकथामका उपायहरू समावेश छन्। विशेष गरी, काठमाडौंमा कुनै आपराधिक घटना भएमा ७ मिनेट भित्र प्रहरी पुग्ने सुनिश्चितता गरिन्छ।
तर, प्रहरीको आफ्नै चाडपर्व मनाउने प्रचलन पनि छ। दशैंको अवसरमा प्रहरीले पूजा गर्ने, टीका थाप्ने, र केही दिनका लागि मासु खुवाउने चलन रहेको छ। तर बजेट अभावका कारण, प्रहरी कार्यालयहरूले चन्दा उठाएर वा केही समय अघि मासु सञ्चय गरेर व्यवस्थापन गर्छन्।
