प्रिन्स मिश्रा, कपिलवस्तु – बडादशैँको अवसरमा कपिलवस्तुको बहादुरगंजमा दुर्गा भवानीको मूर्ति भव्य समारोहका साथ विसर्जन गरिएको छ। स्थानीय कलाकारहरूले निर्माण गरेको दुर्गा भवानीको प्रतिमालाई ९ दिनसम्म पूजा आराधना गरी, विजया दशमीको दिन विधिवत् रुपमा विसर्जन गरिएको हो।
समारोहको मुख्य आकर्षणमा दुर्गा भवानीसँगै भगवान शिव, गणेश, कात्तिक, लक्ष्मी र सरस्वतीका प्रतिमाहरू पनि सामेल थिए। बहादुरगंजको मुख्य चोकमा विधिपूर्वक स्थापना गरिएका यी प्रतिमाहरूलाई हिन्दू धर्मशास्त्रअनुसार नवमीका दिनसम्म पूजा गरिएको थियो।
विजया दशमीको दिन, स्थानीय प्रहरीको सुरक्षा व्यवस्थाबीच भक्तजनहरूले नाचगान र भजनका साथ बजार परिक्रमा गराउँदै मूर्ति विसर्जन गरेका थिए। बाजागाजा र पारम्परिक धुनले समारोहलाई अझै उल्लासमय बनाएको थियो। विसर्जनअघि भक्तजनहरूले दुर्गा भवानीसँग समृद्धि, सुख र शान्तिका लागि प्रार्थना गरेका थिए।
समारोहमा स्थानीय बासिन्दाहरूको उल्लेखनीय सहभागिता रह्यो भने छिमेकी गाउँबाट पनि ठूलो संख्यामा भक्तजनहरू आएका थिए। यस अवसरमा मौलिक सांस्कृतिक र धार्मिक परम्परालाई संरक्षण गर्दै भावपूर्ण वातावरणमा विसर्जन कार्यक्रम सफलतापूर्वक सम्पन्न भएको हो।
