काठमाडौँ ।एक स्थानीय विद्यालयले विद्यार्थीहरूको उपस्थिति सुधार गर्न सुरु गरेको दिवाखाजा कार्यक्रमले सकारात्मक प्रभाव पारेको छ। हप्ताको तीन दिन फरक–फरक भोजनको व्यवस्था गरिएको छ। बुधबार अन्डा राखिएको राइस फ्राई, बिहीबार खिचडी, र शुक्रबार फलफूल खुवाइन्छ। खाजा खुवाउने र भान्साको सरसफाइ गर्नका लागि एकजना भान्से कर्मचारीको व्यवस्था गरिएको छ, जसको मासिक तलब सात हजार रूपैयाँ विद्यालयको खाजा कार्यक्रमकै बजेटबाट दिइँदै आएको छ।
विद्यालयका शिक्षक अमरबहादुर महराका अनुसार, खाजा कार्यक्रमपछि विद्यार्थीहरू नियमित रूपमा विद्यालय आउने मात्र होइन, दिनभर कक्षामा बस्न समेत प्रेरित भएका छन्। यो कार्यक्रमले विद्यार्थीको उपस्थिति सुधार गर्न महत्त्वपूर्ण भूमिका खेलेको उनले बताए।
खाजा कार्यक्रमबाट भएको बचतले विद्यालयका लागि दुई थान ल्यापटप र गर्मी मौसममा प्रयोग गर्न एक थान रेफ्रिजेरेटर खरिद गरिएको छ। रेफ्रिजेरेटरले अभिभावक, शिक्षक, विद्यार्थी र अन्य कर्मचारीलाई चिसो पिउने पानी उपलब्ध गराउन मद्दत पुर्याएको छ। साथै, यसले भान्सामा राखिने खाद्यान्नहरूलाई सुरक्षित रूपमा भण्डारण गर्न पनि सहयोग गरेको छ।
खर्च तथा आम्दानीको विवरण हरेक तीन महिनामा शिक्षकहरूको बैठकमा प्रस्तुत गरिन्छ, जहाँ अनुमोदनपछि सुधारका लागि आवश्यक राय–सुझाव लागू गरिन्छ। प्रधानाध्यापक गणेशप्रसाद पन्तले यो कार्यक्रम विद्यालयको वार्षिक योजनामा समावेश रहेको र नियमित रूपमा कार्यान्वयन भइरहेको जानकारी दिए।
