लहान ।सिरहा जिल्लाको सुखीपुर नगरपालिका-१० लालसैया क्षेत्रमा एक अपरिचित युवकको शव फेला परेको छ। सोमबार अपरान्ह गागन खोलाको किनारमा करिब २० वर्षको युवकको शव भेटिएको हो।
जिल्ला प्रहरी कार्यालय सिरहाका सूचना अधिकारी डीएसपी बीरेन्द्र कुमार पासवानले घटनाको पुष्टि गर्दै, घटनास्थलमा मुचुल्का उठाउने कार्य जारी रहेको र शवको पहिचान खुल्न बाँकी रहेको जानकारी दिएका छन्। उनले भने, ‘अहिलेसम्म शवको पहिचान हुन सकेको छैन। प्रहरी घटनास्थलको अनुसन्धान गरिरहेको छ, त्यसैले मृत्युको कारण तत्काल भन्न सकिने अवस्था छैन।’
डीएसपी पासवानले शव पहिचानका लागि प्रयास भइरहेको जनाउँदै, गत असोज २७ गतेदेखि गाेलबजार नगरपालिका-१३ का श्रीदेव महराका छोरा कृष्णा महरा हराइरहेको सूचना आएको बताए। कृष्णा महरा दुर्गा मेला हेर्न गएका थिए र त्यसपछि बेपत्ता भएका थिए। प्रहरीले हाल फेला परेको शव कृष्णा महराको हुनसक्ने आशंका गरे पनि यो कुरा अझै निश्चित नभएको जनाएको छ।
यस घटनाको थप अनुसन्धान भइरहेको छ।
