काठमाडौँ।वर्तमान सरकारले कार्यभार सम्हालेको पहिलो सय दिनको अवधिमा दुई सय उद्योगमा करिब ३४ अर्ब रुपैयाँ बराबरको लगानी प्रतिबद्धता प्राप्त भएको छ। प्रधानमन्त्री केपी शर्मा ओलीले सरकारको एक सय दिनको प्रगति सार्वजनिक गर्दै अर्थतन्त्रमा सुधारका सङ्केत देखिन थालेको बताएका छन्।
प्रधानमन्त्री ओलीले व्यवसायीहरूको आत्मविश्वास बढाउनका लागि आर्थिक सुझाव आयोगजस्ता महत्वपूर्ण आयोगको गठन भएको जानकारी दिए। अन्तर्राष्ट्रिय स्वतन्त्र विज्ञ संस्थाबाट नेपालको क्रेडिट रेटिङ गर्ने प्रक्रिया अन्तिम चरणमा रहेको उनले बताए। साथै, लामो समयदेखि ओरालो लागेको शेयर बजार प्राकृतिक विपत्तिका बाबजुद सुधारको लयमा रहेको प्रधानमन्त्रीले जनाए।
पेट्रोलियम पदार्थको सहज आपूर्ति र भण्डारणका लागि भारतको सिलिगुडीदेखि झापा र अमलेखगञ्जदेखि चितवनसम्म पाइपलाइन विस्तार गर्ने योजना अघि बढाइएको र त्यससम्बन्धी सम्झौता नेपाल आयल निगम र इन्डियन आयल कर्पोरेसनबीच सम्पन्न भएको उनले बताए। वस्तु, सेवा, र प्रक्रियाको गुणस्तर सुनिश्चित गर्न नेपाल एक्रिडिटेसन सेन्टर सञ्चालनमा ल्याइएको जानकारी पनि प्रधानमन्त्रीले दिए।
चालु आर्थिक वर्षको असोज मसान्तसम्म संघीय सरकारको खर्च ३२९ अर्ब रुपैयाँ पुगेको छ, जुन अघिल्लो वर्षको सोही अवधिको तुलनामा केही प्रतिशतले बढी हो। कुल राजस्व परिचालनमा पनि १३.३ प्रतिशतले वृद्धि भई करिब २४८ अर्ब रुपैयाँ संकलन भएको छ।
