काठमाडौं।सशस्त्र प्रहरी महानिरीक्षक राजु अर्यालले नवनियुक्त प्रहरी निरीक्षकहरूलाई कुनै पनि बाह्य प्रभावबाट मुक्त रहँदै जिम्मेवार र इमानदार जनसेवामा खटिन निर्देशन दिएका छन्। सशस्त्र प्रहरी निरीक्षक १६औं समूहका अधिकृतहरूको दीक्षान्त समारोहमा उनले राज्य, सङ्गठन, र आम नागरिकको आशा पूरा गर्न व्यावसायिक क्षमताका साथ कार्यक्षेत्रमा परिचालन हुन प्रोत्साहित गरे।
महानिरीक्षक अर्यालले विपद् व्यवस्थापन, आकस्मिक खोज तथा उद्धार, सीमा सुरक्षा, हुलदङ्गा व्यवस्थापन, तथा विशिष्ट व्यक्ति र प्रतिष्ठान सुरक्षाजस्ता संवेदनशील जिम्मेवारीमा सशस्त्र प्रहरी बलको महत्वपूर्ण भूमिका रहेको बताए। उनले “राजस्व चुहावट नियन्त्रणमा पनि सङ्गठनले ठोस परिणाम दिइरहेको छ, जसमा तपाईंहरूको योगदान थप प्रभावकारी हुने आशा राखेको छु,” भने।
दीक्षान्त समारोहमा सहभागी भएका १६औं समूहका ४५ प्रशिक्षार्थी (३ महिला र ४२ पुरुष) दीक्षित भएका थिए। प्रधानमन्त्री केपी शर्मा ओलीको उपस्थितिमा मातातीर्थस्थित सशस्त्र प्रहरी बल प्रशिक्षण प्रतिष्ठानमा आयोजित समारोहमा आधारभूत तालिम सफलतापूर्वक सम्पन्न गरेका प्रशिक्षार्थीहरूलाई सम्मानित गरियो।
सशस्त्र प्रहरी नायब महानिरीक्षक कमल गिरीका अनुसार, २०८० साउन १० मा सुरु भएको यो तालिम तीन चरणमा विभाजित थियो। प्रशिक्षार्थीहरूले कन्भेन्सनल ट्याक्टिस, व्यक्तिगत बन्दोबस्ती, कवाज, हतियार तालिम, प्राथमिक उपचार, परम्परागत युद्धकला, तथा फिल्ड र ब्याटल क्राफ्टजस्ता विभिन्न विषयहरूमा विशेष प्रशिक्षण प्राप्त गरेका थिए, जुन २१ विशेषज्ञ प्रशिक्षकहरूले प्रदान गरेका थिए।
