काठमाडौँ।नेपालमा डेङ्गी भाइरसका तीन प्रमुख प्रकार (सेरोटाइप-१, सेरोटाइप-२, र सेरोटाइप-३) सक्रिय रहेको पुष्टि भएको छ। इपिडिमियोलोजी तथा सरुवा रोग नियन्त्रण महाशाखाका किटजन्य रोग शाखाका प्रमुख डा. गोकर्णप्रसाद दाहालले भाइरसको हालको अवस्था सार्वजनिक गर्दै कात्तिक महिनासम्म लामखुट्टे सक्रिय हुने र संक्रमणको उच्च जोखिम रहेको बताएका छन्।
विगत सात वर्षयता देशभर चार प्रकारका सेरोटाइपहरू सक्रिय रहँदै आए पनि अहिले तीन सेरोटाइपले मात्रै फैलावट गरिरहेको पाइएको छ। यस वर्षको अहिलेसम्मको आँकडामा देशभर २७,१५३ जनामा डेङ्गी संक्रमण देखिएको छ, जसमा कास्कीमा सबैभन्दा धेरै ७,०८० जना र काठमाडौँ उपत्यकामा ५,७४८ जना संक्रमित छन्। यसले गर्दा काठमाडौँ जिल्लामा ४,०६० जना, भक्तपुरमा ६२८ जना, र ललितपुरमा १,०६० जना प्रभावित भएका छन्।
डेङ्गी संक्रमणबाट अहिलेसम्म ११ जनाले ज्यान गुमाइसकेका छन्। “एडिज एजिप्टी” र “एडिस एल्बोपिक्टस्” प्रजातिका लामखुट्टेहरू पानी जम्ने स्थानहरूमा फुल पार्ने र सोही स्थानबाट संक्रमण फैलाउने मुख्य कारण बनेको छ। वर्षाको मौसममा पानी जमाएर राख्नाले यी लामखुट्टेहरूको संख्या बढ्ने गरेकोले सावधानी अपनाउन सरकारको अनुरोध छ।
सरकारले संक्रमण नियन्त्रणका लागि हरेक शुक्रबार सरकारी तथा गैरसरकारी कार्यालय र अस्पताल परिसरमा सरसफाइ गर्दै ‘लामखुट्टे खोज र नष्ट गर’ अभियान सञ्चालन गर्ने निर्णय गरेको छ।
