काठमाडौं। नेपालीहरूको दोस्रो ठूलो चाड यमपञ्चक, अर्थात् तिहारको अवसरमा, आज औँसीको दिन भए तापनि कुनै पर्व नमनाइने भएको छ। नेपाल पञ्चाङ्ग निर्णायक विकास समितिले औँसी बेलुकी भएका दिन लक्ष्मीपूजा बिहीबार नै सम्पन्न भएको र गाई पूजासहितका विशेष पर्वहरू शनिबार पर्ने जानकारी दिएको छ।
समितिले जारी गरेको विज्ञप्तिमा औँसीमा खासगरी पितृकर्म गरिने र यसलाई पर्वका रूपमा मानिने भए पनि यस वर्षको औँसीमा सूर्योदय भएका कारण तिथिमा घटबढ देखिएको जनाएको छ। यस कारण, तिहार चाड सामान्य पाँच दिनको सट्टा यस वर्ष छ दिनसम्म लम्बिएको छ।
शनिबार कार्तिक १७ गतेको दिनमा गाई पूजा, गोवद्र्धन पूजा, बलिपूजा, हलीतिहार, म्ह पूजा र नेपाल संवत् ११४५ को प्रारम्भ गरी कुल छ पर्व एकै दिन मनाइने उल्लेख छ। नेपालका केही समुदायमा औँसीकै दिन गाई पूजा गर्ने परम्परा भए पनि धर्मशास्त्रविद् प्रा. डा. रामचन्द्र गौतमका अनुसार शास्त्रीय मान्यताअनुसार औँसीको अन्त्य र प्रतिपदाको सुरुआतमा गाई पूजा गर्नुपर्ने भएकाले यसलाई शनिबारको दिनमा मनाउन सुझाव दिइएको छ।
तिहारको अन्तिम दिन, कात्तिक १८ गते आइतबार दिदीबहिनीहरूले दाजुभाइलाई परम्परागत रूपमा पञ्चरङ्गी वा सप्तरङ्गी टीका लगाइ तिहार समापन गर्ने प्रचलन छ।
