लहान— लामो रस्साकस्सीपछि लहान नगरपालिकाका मेयर महेश चौधरी र खुट्टी नहर सिंचाई संघर्ष समितिबीच महत्वपूर्ण सहमति भएको छ। निरन्तर आन्दोलनका कारण लहान क्षेत्रको सामाजिक सद्भाव र शान्ति सुरक्षामा परेको प्रभावलाई ध्यानमा राख्दै, दुबै पक्षले आपसी समझदारीसहित सम्झौतामा हस्ताक्षर गरेका हुन्।
बिहीबार जिल्ला प्रशासन कार्यालय सिराहामा सम्पन्न संयुक्त बैठकमा लहान नगरपालिकाले निर्माणाधीन खुट्टी खोला सिंचाई नहर खुला रूपमा निर्माण गर्न संघ, प्रदेश, र स्थानीय तहको लगानी जुटाउने प्रतिबद्धता जनाएको छ। साथै, हाल निर्माणाधीन नहरमा भइरहेको ढल निर्माण कार्य स्थगित गर्ने तथा ठेक्का सम्झौता अन्त्य गर्ने प्रक्रिया अघि बढाउने सहमति भएको छ।
सम्झौतामा लहान नगरपालिकाभित्र अतिक्रमण भएका सरकारी तथा सार्वजनिक जग्गा खाली गराउन प्रक्रिया अघि बढाउने विषयलाई पनि प्राथमिकता दिइएको छ। यस कार्यमा स्थानीय प्रशासन, राजनीतिक दल, नागरिक समाज तथा सबै पक्षको सहकार्य आवश्यक हुने भन्दै सहमति जुटाइएको छ।
सम्झौतासँगै संघर्ष समितिले आफ्ना सम्पूर्ण आन्दोलन तथा विरोध कार्यक्रम स्थगित गर्ने निर्णय गरेको छ। समितिका संयोजक धर्मराज चौधरीका अनुसार, सहमतिले किसानहरूको माग पूरा गर्न सहयोग पुग्ने र लहान क्षेत्रको सामाजिक सद्भाव पुनः स्थापित हुने अपेक्षा गरिएको छ।
यस समझौतासँगै लहान क्षेत्रमा लामो समयदेखि भइरहेको असमझदारी अन्त्य भई, विकास र शान्ति प्रक्रियामा नयाँ मोड आउने विश्वास गरिएको छ।
